මෙම උතුම් අවස්ථාව සමරමින්, ලබන සෙනසුරාදා, එනම් අගෝස්තු 29 වෙනි දා, සවස 6 ට, ශුද්ධෝත්තම රොහාන් ලලිත් අපොන්සු අපොස්තුළුතුමාණන් විසින්, නිරා සර්පයා තම දෙපයින් පාගාගෙන සිටින ඉපැරණි දේව මාතා ප්‍රතිමාවෙන් ද සැදැහැවතුන්ව ආශිර්වාද කරනු ලබනවා.

2018 අගෝස්තු 11 වෙනි සෙනසුරාදා සවස දිවයිනේ සතර අතින් ගැලූ මහා ජන ගංගාවක් මැද අප ශුද්ධෝත්තම රොහාන් ලලිත් අපොන්සු අපොස්තුළුතුමා, දර්ශණ දෙව්මැඳුර ආශිර්වාද කර, නිර්මල කන්‍ය මරිය තුමියට භාර දුන්නේ, “මාගේ ආදර දරුව, මෙම ස්ථානයෙහි මා නමට කුඩා දෙව් මැඳුරක් ඉදිකරන්න. එය මගේ උතුම් ආශාවකි” යනුවෙන් නිර්මල කන්‍ය මරිය තුමිය ම, ශ්‍රී ලංකාවේ, කටුනායක, එතුමිය දර්ශණය වූ ස්ථානයේ, කුඩා දෙව්මැඳුරක් ඉඳිකරන ලෙස කරනු ලැබූ ඉල්ලීම නිසයි. එසේ කිරීම එතුමියගේ උතුම් ආශාවක් බව ද පැවසූ නිසයි.

මේ අනුව ප්‍රතිසංස්කරණය කරනු ලැබූ දර්ශණ දෙව්මැඳුර දයාබර මෑණියන්ගේ දෝතට භාරදී වසර 8 ක් සම්පූර්ණ වීමේ සංවත්සරය, ලබන සෙනසුරාදා, එනම් අගෝස්තු 29 වෙනි දා, සවස 6 ට සමරණු ලබන්නේ, මරිය තුමියගේ ඉල්ලීම අසාගත් ශුද්ධෝත්තම අපොස්තුළුතුමන්ගේ ප්‍රධානත්වයෙනුයි. අභිනව දර්ශණ දෙව් මැඳුර, ආසිරි ගන්වා වසර අටක් සම්පූර්ණ වන අතරේ, මරිය තුමිය ද, අට වරක්, මේ දර්ශණ දෙව්මැඳුර තුල ස්ථාපිත එතුමියගේ ප්‍රතිමාවෙන් පිච්ච මල් සුවඳ පතුරුවා ඇති බව විශේෂයෙන් සඳහන් කල යුතුමයි.

නිර්මල කන්‍ය මරිය මාතාවෝ ශ්‍රී ලංකාවේ දී දර්ශණය වූ ප්‍රථම අවස්ථාව වන්නේ, කටුනායක අප ස්වාමිදූගේ සිද්ධස්ථානයෙහි දර්ශණය වීමයි. 1975 පෙබ්‍රවාරි 5 වෙනි දින සවස එතුමිය ශුද්ධෝත්තම රොහාන් ලලිත් අපොන්සු අපොස්තුළුතුමන් ඉදිරියේ ජීවමානව ම පෙනී සිටිමින් දර්ශණය වූ අතර, මේ වන තුරු විසිතුන් වතාවක් දර්ශණය වී තිබෙනවා.

1976 මැයි මස 11 වෙනි දින ශුද්ධෝත්තම රොහාන් ලලිත් අපොන්සු අපොස්තුළු තුමාණන්ට, මරිය තුමී දර්ශණය වී, “මාගේ ආදර දරුව, මෙම ස්ථානයෙහි මා නමට කුඩා දෙව් මැඳුරක් ඉදිකරන්න. එය මගේ උතුම් ආශාවකි” යනුවෙන් කරනු ලැබූ අතර, මෙම පණිවිඩය ඇසූ ශුද්ධෝත්තම අපොස්තුළුතුමා මරිය තුමියගේ ආශාව, ශුද්ධෝත්තම අපොස්තුළු තුමන්ගේ ද ආශාව බවට පත්කර ගනිමින්, දෙමාපියන් වෙතින් තමන්ට ලැබුණ, උපන් දා සිට හැදුන වැඩුන නිවස, එදත් ශුද්ධෝත්තම රොහාන් ලලිත් අපොන්සු අපොස්තුළුතුමන්ගේ පුද්ගලීක ධනයෙන්, ලහි ලහියේ දෙව්මැඳුරක් බවට පරිවර්තනය කිරීමේ කටයුතු ආරම්භ කරනු ලැබුවා. එහි ප්‍රතිඵලයක් වශයෙන් වර්ෂ 1976 දෙසැම්බර් මස 6 වෙනි දින උදේ, කටුනායක අප ස්වාමිදූගේ දෙව්මැඳුර, ශුද්ධෝත්තම රොහාන් ලලිත් අපොන්සු අපොස්තුළු තුමාණන් වහන්සේගේ සුරතින් අභිෂේක කර, මරියෝතමාවන්, “කටුනායක අප ස්වාමිදූ” වශයෙන් ප්‍රකාශයට පත් කර, දෙව් මවු ප්‍රතිමාවට උන්වහන්සේගේම සුරතින් රන් ඔටුණු පළඳවනු ලැබුවා.

ඉන්පසු පියවරෙන් පියවර විවිධ අංග එකතු වෙමින් ඉදිරියට පැමිණි දර්ශණ දෙව්මැඳුර, වර්ෂ 2016 දී පමණ, දැවැන්ත ප්‍රතිසංස්කරණයකට ලක් කරනු ලැබූ අතර, පැරණි දර්ශණ දෙව් මැඳුර මතින් අලංකාර දර්ශණ දෙව්මැඳුරක් ඉදිවී 2018 අගෝස්තු 11 වෙනි දින, අභිනව දර්ශණ දෙව්මැඳුර, ශුද්ධෝත්තම රොහාන් ලලිත් අපොන්සු අපොස්තුළුතුමන් විසින් ආශිර්වාද කර විවෘත කරනු ලැබුවා.

මේ දැවැන්ත ප්‍රතිසංස්කරණ ක්‍රියාවලියේ බර තම හිස උඩ තබා ගනිමින්, මේ දැවැන්ත පියවර මෙහෙයවනු ලැබුවේ, අපොස්තලික මාධ්‍ය අධ්‍යක්ෂක මනෝජ් චින්තක මහතා විසිනුයි.

2018 අගෝස්තු 18 වෙනි දින නිර්මල මරිය තුමියගේ ආශාව ඉටුකරමින්, එතුමිය ට භාරදුන් අභිනව දර්ශණ දෙව්මැඳුරේ 8 වන සංවත්සර සමරා, අගෝස්තු 15 වෙනි සෙනසුරාදා සවස 6 ට, ශුද්ධෝත්තම රොහාන් ලලිත් අපොන්සු අපොස්තුළුතුමන්ගේ ප්‍රධානත්වයෙන් මංගල දිව්‍ය පූජාව දර්ශණ දෙව්මැඳුර තුල දී පැවැත්වෙන අතර, නිර්මල දේව මාතා ප්‍රතිමාවෙන් සැදැහැවතුන් ආසිරි ගැන්වීම ද, ශුද්ධවූ කුරුසියේ ආශිර්වාදය දානය කිරීම ද, ශුද්ධෝත්තම අපොස්තුළුතුමන්ගේ ප්‍රධානත්වයෙන් සිදු කරනු ලබනවා.

අභිනව දර්ශණ දෙව්මැඳුරට වසර අටක් සම්පූර්ණ වන අතරේ, දර්ශණ දෙව්මැඳුර තුල තැන්පත් කර ඇති, ජේසු බිළිඳුන් අත දරා සිටින මරිය තුමියගේ ප්‍රතිමාවෙන් අට වාරයක් ප්‍රාතිහාර්්‍යාත්මක ලෙස පිච්ච මල් සුවඳ පතුරුවාලීමට මරිය තුමිය අභිප්‍රාය කර තිබීම ද විශේෂත්වයක්.

මෙහි ඡායාරූපයෙන් ඔබට පෙනෙන්නේ 2018 අගෝස්තු 11 වෙනි දින සවස ශුද්ධෝත්තම රොහාන් ලලිත් අපොන්සු අපොස්තුළුතුමා අභිනව දර්ශණ දෙව්මැඳුර තුලට ඇතුළුවන අන්දමයි

අප නිවසට ආසන්නව පුද්ගලීක බෙහෙත් ශාලාවක් පවත්වාගෙන යන මේ වෛද්‍යවරයාගේ උපදෙස් අනුව, මම වහාම පියවර ගත්තේ හැකි ඉක්මනින් අදාල විශේෂඥ වෛද්‍යවරයා වෙතට මගේ බිරිඳව රැගෙන යාමටයි.

කොහොමහරි කඩිනමින් ම විශේෂඥ වෛද්‍යවරයාව සමුවන්නට අපට අවස්ථාව සැලසුනා. මගේ බිරිඳවත්, ලේ පරීක්ෂණ වාර්තාවනුත් පරීක්ෂා කල වෛද්‍යවරයා නළල රැලි ගන්වාගෙන, බිරිඳව වහාම රෝහලට ඇතුලත් කිරීම සඳහා ලිපියක් දුන්නා. බිරිඳට නොතේරෙන ආකාරයට වෛද්‍යවරයා ඉතා සෙමින් මට පැවසුවේ, තත්වය ඉතාමත්ම භයානක බවත්, බොහෝ විට දරුවා නැතිවීමට ඉඩ ඇති බවත්, කොහොමහරි බිරිඳව බේරා ගැනීමත් ලොකු වගකීමක් බවත් පවසා, කණගාටු මුහුණින් මගේ පිටට තට්ටු කලා.

ඉතා ඉක්මනින් ම බිරිඳව රෝහලට ඇතුළත් කලා. බිරිඳ වාට්ටුවේ සිටියේ පැය කීපයක් පමණයි. ඇයට හොඳට ම අමාරු වුනා. ඇය අසාධ්‍ය තත්වයට පත්වෙන්න වැඩි වේලාවක් ගත වුනේ නැහැ. ඉක්මනින් ම බිරිඳව දැඩි සත්කාර ඒකකයට සාත්තු සේවකයන් සහ හෙදියන් විසින් ඉතා කඩිනමින් අරගෙන ගියා.

ටික වේලාවකට පසුව කරුණාවන්ත හෙදියක් දැඩි සත්කාර ඒකකය ඇතුලේ සිට පිටතට පැමිණියා. මම ඇය වෙතට දුවගෙන ගියා. ඇය ඉතාමත් හැඟුම්බරව මට පැවසුවේ, මගේ බිරිඳගේ තත්වය ඉතාමත් අවදානම් බවත්, අඩුතරමින් කුසයේ සිටින දරුවාවවත් බේරාගැනීම සඳහා සැත්කමක් කිරීම ද මේ වෙලාවේ දුෂ්කර බවත්, කොහොමත් මේ වෙලාවේ ධෛර්්‍යයෙන් සිටින ලෙසත් ය. එසේ පවසා මා වෙතින් ඉවත්ව කොරිඩෝව දිගේ ඇවිදගෙන ගිය ඈ, තරමක් දුරගොස් නැවත ආපසු හැරී ඇවිත් මට මෙහෙම කිව්වා. “මට පුළුවන් ඔයාට පොඩි උදව්වක් කරන්න. ඔයා මං ගැන මොනවා හිතයි ද දන්නෙ නැහැ. ඔයා කැමති නම් මේ වෙලාවෙ දෙවියන්ට කන්නලව් කරන්න. දෙවියන්ට කන්නලව් කරනවානම් මෙතන ඉඳගෙන ඒක කරන්න බැහැ. ඔයා යන්න ඕන, කටුනායක. කටුනායක තියනවා දේව මෑණියන්ගේ පල්ලියක්. මහා පුදුම හාස්කම් තමයි සිද්ධ වෙන්නෙ. මටත් අත්දැකීම් කීපයක් ම තියෙනවා. හැබැයි විශ්වාසයෙන් යන්න ඕනා. ඔයා පිළිගන්නවානම් පිළිගන්න, ඒ පල්ලියට දේව මෑණියො හැබහින් ම එනවා. එක වෙලාවකට ප්‍රතිමාවෙන් සුවඳ එනවා. මහා පුදුම දේවල් වෙන්නෙ. දැන් අද සිකුරාදනෙ. හෙට යන්න. සෙනසුරාදා සවස 6 ට තමයි දේව මෙහෙය පටන් ගන්නෙ.

ඉතින් අර හෙදිය කිව්ව විදිහට, පසුවදා සෙනසුරාදා, මම කටුනායක අප ස්වාමිදූගේ සිද්ධස්ථානය සොයාගෙන ගියා. මම යනකොට වෙලාව සවස 5 ට විතර ඇති. ඒ වෙනකොටත් බැතිමතුන් විශාල පිරිසක් රැස්ව සිටියා. ඒ අතර සිටි එක් මහත්මයෙක් සමග මම කතා කලා. ඔහු කටුනායක සිද්ධස්ථානයේ සිදුවන හාස්කම් ගැන බොහෝ තොරතුරු මාත් එක්ක කිව්වා. ඒ දවසේ කුරුසියේ ආශිර්වාදය ලබාදෙන බවත්, එය ලබා ගැනීමට ඉක්මනින් පත්‍රිකාවක් ලබාගන්නා ලෙසටත් ඔහු කිව්වා. මම ඉක්මනින්ම ගොස් කුරුසියේ ආශිර්වාදය ලබා ගැනීමට පත්‍රිකාවක් ලබා ගත්තා. මගේ විස්තරය දැනගත් අර කිව්ව මහත්මයා මට කිව්වා, මේ දෙන කුරුසියේ ආශිර්වාදය බොහෝම බලවත්, හාස්කම් සිදුවෙන ආශිර්වාදයක් බවත්, මේ අපොස්තුළුතුමන්ට දේව මෑණියන් ම ඉගැන්වූ වචන වගයක් ඒ වෙලාවට කියන බවත්, කුරුසිය හිස මත තබත්දී, අසාධ්‍යව සිටින බිරිඳවත්, දරුවාවත් සිහිකරන්න කිව්වා.

ඉන්පසු ටික වේලාවකින්, හාස්කම් යාච්ඤාව කියනු ලබන, දේව මෑණියන්ගේ ප්‍රතිමාව තැන්පත් කර ඇති ස්ථානයට අප දෙදෙනාටම යන්නට අවස්ථාව ලැබුනා. මම දර්ශණ ඉටිපහන් තුනක් ලබා ගත්තා. බිරිඳවත්, කුසයේ සිටින දරුවාත්, මාත් වෙනුවෙන්. අර විස්තර කිවූ මහත්මයා තමයි මට දර්ශණ ඉටිපහන් ගැන කිව්වෙ. ඔහුත් දර්ශණ ඉටිපහන් අරගෙන තිබුණා. එදින ශුද්ධෝත්තම අපොස්තුළුතුමන්ගේ ප්‍රධානත්වයෙන් දිව්‍ය සත්ප්‍රසාද ආශිර්වාදය සමග හාස්කම් යාච්ඤාව පැවැත් වුනා.
එයින් පසුව පූජාසනයෙන් පිටත්ව ගිය ශුද්ධෝත්තම අපොස්තුළුතුමා, කෙටි වේලාවකින් කුරුසිය රැගෙන නැවත පූජාසනයට පැමිණියා. ඒ අතර වාරයේ මා සමග සිටි මහත්මයා කටුනායක දේව මෑණියන්ගේ සිද්ධස්ථානය ගැන තවත් බොහෝම දේවල් මාත් සමග කිව්වා. ඔහු සෑම සෙනසුරාදාවකම කටුනායක මේ සිද්ධස්ථානයට පැමිණෙන බවත්, ඔහු මේ වන විට බොහෝ පිහිට ලබාගෙන ඇති බවත්, ඇත්තටම අද ඔහු ජීවත්වෙන්නේ, සෙනසුරාදා සවස මේ සිද්ධස්ථානයෙන් ලබාගන්නා ආශිර්වාදයෙන් බවත්, ඔහු මට පැවසුවා. ඔහු මට කිව්ව දේවල් නිසා මම පුදුමයෙනුයි අසාගෙන සිටියේ.

අර මහත්මයාටත් මටත් කුරුසියේ ආශිර්වාදය ලබා ගැනීමේ වෙලාව එලඹුනා. මට ඉස්සරහින් සිටි ඒ මහතා පළමුවෙන්, ශුද්ධෝත්තම අපොස්තුළුතුමන් ඉදිරියේ දණගසා ශුද්ධවූ කුරුසියේ ආශිර්වාදය ලබා ගත්තා. ඉන්පසුව මට අවස්ථාව ලැබුණා. මම ශුද්ධෝත්තම අපොස්තුළුතුමන් ඉදිරියේ දණ ගැසුවා. උන්වහන්සේ මගේ හිස මත ශුද්ධවූ කුරුසිය තැබුවා. අයිස් කැට සහිත බෑගයක් හිස මත තැබුවාක් වැනි මහා සීතලක් මුළු ඔලුව පුරාම පැතිරුණා. “මේ ආශිර්වාදය අසාධ්‍යව සිටින මාගේ බිරිඳටත්, කුසයේ සිටින දරුවාටත් ලැබේවා`” කියලා මම සිතින් සිහිපත් කලා. එවිට වේලාව රාත්‍රී 9.30 ට විතර ඇති. කුරුසියේ ආශිර්වාදය ලබාගත් පසුව මම අර මහත්මයාට කිව්වා මට වෙච්ච සිද්ධිය. ඔහු කිව්වා බොහෝම හොඳ ලකුණක්. බය වෙන්න එපා, දෙදෙනාම බේරෙනවා. සමහර විට මේ වෙත්දී සනීප වෙලාත් ඇති කියලා.

පසුව ඒ කරුණාවන්ත මහත්මයා, මට කිව්වා ඔහු යන පාරෙන් පොඩ්ඩක් හරවාගෙන ගියහම රෝහලට යන්න පුළුවන්, මාව රෝහල ලඟින් දාන්නම්, ඔයා බිරිඳගේ තත්වය බලන්න කියලා. මම නිකමට වගේ, කටුනායක සිද්ධස්ථානය ගැන කිව්ව හෙදියට දුරකතන ඇමතුමක් ගත්තා, ඒ වෙනකොට වෙලාව රාත්‍රී 11 ට විතර ඇති. ඒ කරුණාවන්ත හෙදිය, ක්ෂණිකව පිළිතුරු දුන්නා. මම කිසිවක් කියන්න පෙර, ඇය ඇසුවා, ‘ඔයා කටුනායක ගියාද’ කියලා. මම කිව්වා, ‘ඔවු ගියා, මේ එන ගමන්, මට මහ පුදුම දෙයක් වුනා’ කියලා. එවිට අර කරුණාවන්ත හෙදිය කිව්වා, ‘ඔවු ඔවු ඔය පුදුම දේ මෙහෙත් වුනා. හොඳ වෙලාවට අද මම ඩියුටි. රෑ නවයාමාරට විතර මට පිච්ච මල් සුවඳක් ආවා. කටුනායක පල්ලිය ගැන මම දන්න නිසා මම හිතුවා මොකක් හරි හොඳ දෙයක් කියලා. මම ඔයාගේ නෝනව බැලුවා, උණ සම්පූර්ණයෙන්ම බැහැලා, බඩේ දරුවත් හෙමිහිට දඟලනවා’ කියලා ඒ හෙදිය මට සතුටින් කිව්වා. එන්න පුළුවන්ද කියලත් ඇසුවා. මම අර මහත්මයාට විස්තරය කිව්වා. ඔහුට හරිම සන්තෝශයි. ‘මම කිව්වෙ, මම කිව්වෙ, ඕකනෙ මම කිව්වෙ, කටුනායක ගිහින් විශ්වාසයෙන් ඉල්ලුවොත් වරදින්නෙ නැහැ කියල’ ඔහු කිව්වා.

පසුව අපි දෙදෙනාම රෝහලට ගියා. රාත්‍රී 12ට විතර ඇති. බොහෝම අමාරුවෙන්, අර හෙදිය නිසා, මට විතරක් ඇතුලට යන්න පුළුවන් වුනා. අර කරුණාවන්ත හෙදිය මගෙන් විස්තර ඇසුවා. ඇය කිව්වා සිද්ධිය වුනේ රාත්‍රී නවයහමාරට විතර කියලා. මම කිව්වා මට කුරුසිය තැබුවේත්, රාත්‍රී නවයහමාරට විතර කියලා. පසුව ටික වේලාවකට මාව බිරිඳ ලඟට අරගෙන ගියා. ඇය හොඳ සුවයෙන් සිටියා. ‘මට දැන් සනීපයි’ ඇය කිව්වා.

අර හෙදිය කිව්වා, ‘දැන් ඔයා ගෙදර යන්න. හෙට බොහෝ දුරට සාමාන්‍ය වාට්ටුවට දාන්න පුළුවන් වෙයි’ කියලා. පසුදින වෛද්‍ය පරීක්ෂණ, ලේ පරීක්ෂණ කීපයකට පසු බිරිඳව සාමාන්‍ය වාට්ටුවට දැම්මා. ඊට දින තුනකට පසු, නියම බර ප්‍රමාණයෙන් යුතුව, නිරෝගී දරුවෙකු කිසිදු කරදරයක් නැතිව ප්‍රසූත කිරීමට මගේ බිරිඳට හැකියාව ලැබුණා.

“මේ කෙනා සනීප වෙච්ච හැටි හිතාගන්නවත් බැහැ, හරිම පුදුමයි” කියලා වෛද්‍යවරයා, අර හෙදිය සමග කිව්වයි කියලා, ඒ කරුණාවන්ත හෙදිය මට කිව්වා.

කටුනායක අප ස්වාමිදූගේ සිද්ධස්ථානය ගැන, ශුද්ධවූ කුරුසියේ ආශිර්වාදය අපට ලබා දෙන ශුද්ධෝත්තම අපොස්තුළුතුමා ගැන, රෝහලේ දී හමු වූ කරුණාවන්ත හෙදිය ගැන, කටුණායක අප ස්වාමිදූගේ සිද්ධස්ථානයේ දී මට හමු වූ කරුණාවන්ත බැතිමත් මහත්මයා ගැන මම දැන් මීළඟට කුමක් ලියන්නද කියලා මටවත් සිතා ගන්නට බැහැ.

එදා ඒ සෙනසුරාදා රාත්‍රී 9.30 ට පමණ ශුද්ධෝත්තම අපොස්තුළුතුමා මගේ හිස මත කුරුසිය තබන විට මට දැනුන සීතල, ඒ වෙලාවෙම රෝහලේ හෙදියට දැනුන පිච්ච මල් සුවඳ, ඒ වෙලාවට ම මගේ බිරිඳ සුවය ලැබීම, මේවා ගැන සිතත් දී, මට මතක්වෙන්නේ, පේදුරු අපොස්තුළු තුමාගේ නැන්දණියගේ මවගේ උණ රෝගය, ජේසුස් ක්‍රිස්තුස් වහන්සේ ඇයගේ අත අල්ලා ක්ෂණයකින් සුවකල අයුරු පිළිබඳව, ශුද්ධවූ බයිබලයේ සඳහන් ප්‍රාතිහාර්්‍යාත්මක කතාවයි. මගේ කතාව ඊටත් වඩා උසස්ව සිදුවුන ප්‍රාතිහාර්්‍යයක්. මෙතනදීත් ක්‍රිස්තුස් වහන්සේගේ කුරුසිය සමග අපොස්තුළුතුමෙක් සම්බන්ධ වෙලා, මගේ බිරිඳවත්, දරුවාවත් බේරා ගත්තා.

ශුද්ධවූ කුරුසියේ ආශිර්වාදය දානය කරනු ලබන්නේ පෙබ්‍රවාරි මාසය දක්වා පමණක් බව මට දැනගන්නට ලැබුණා. ඒ ඇයිදැයි මම දන්නේ නැහැ. දේව තීරණවලට අත තියන්නවත්, හේතු අහන්නවත් අපිට බැහැ. එහෙත් මේ කුරුසියේ ආශිර්වාදය ජනතාවට විශාල සෙතක්. එය නැතිවුනොත් සියල්ලන්ට ම පාඩුවක්. කුරුසියේ ආශිර්වාදය ලබා දෙන සෑම දිනයකම කුරුසියේ ආශිර්වාදය ලබා ගැනීම අපගේ ජීවිතවලට ලොකුම පිහිටක්, වාසනාවක්.

තිළිණ දූරංග පෙරේරා – බත්තරමුල්ල

ස්වර්ණ ජුබිලි නත්තල් දිව්‍ය පූජාව ශුද්ධෝත්තම අපොස්තුළුතුමන් පුද කරනු ලැබූවේ කටුනායක අප ස්වාමිදූගේ සිද්ධස්ථානයේ දර්ශණ දේව මන්දීරය තුලයි. විවිධ ප්‍රදේශයන්ගෙන් පැමිණ සිටි සැදැහැවතුන් දර්ශණ දෙව්මැඳුර තුල මෙන්ම දර්ශණ භූමිය පුරා ද රැස්ව සිටි අතර, ශුද්ධෝත්තම අපොස්තුළුතුමන් මෙලොව මෙම ජීවිත සමයේ, මේ මහා පෘතුවිය ස්පර්ෂ කිරීමෙන් පසුව උන්වහන්සේගේ ජීවිතයට උදා වූ හැටඅට වන නත්තල එයයි.

ජේසුස් ක්‍රිස්තුස් වහන්සේ මේ ලෝකයේ ජීවතුන් අතර සිටියදී තෝරාගනු ලැබූ අපොස්තුළුවරුන් සංඛ්‍යාව දොළොසක් වන අතර, උන්වහන්සේ ස්වර්ගාරෝහණයෙන් පසුව මෙලොවට දර්ශණය වී තෝරාගනු ලැබූ අපොස්තුළුවරුන්ගේ සංඛ්‍යාව දෙදෙනෙක්. සිරියාවේ, දමස්කස් නගරයේ දී, දර්ශණය වී තෝරාගනු ලැබූ ශුද්ධෝත්තම පාවුළු අපොස්තුළුතුමා, දර්ශණය වී තෝරාගනු ලැබූ පළමුවන අපොස්තුළුතුමයි. මේ සියළු අපොස්තුළුවරුන් මේ වන විට මෙලොව ජීවතුන් අතර නොමැති අතර, ජේසුස් ක්‍රිස්තුස් වහන්සේ ශ්‍රී ලංකාවේ, කටුනායක නගරයේ දී, දර්ශණය වී තෝරාගනු ලැබූ දෙවන අපොස්තුළුතුමා වන ශුද්ධෝත්තම රොහාන් ලලිත් අපොන්සු අපොස්තුළුතුමා පමණක් දැනට අප අතර ජීවත් වෙයි.

1975 පෙබ්‍රවාරි 7 වෙනි දින අපොස්තුළුවරයෙන් පිදුම් ලැබූ උන්වහන්සේ, සිය ප්‍රථම නත්තල් දිව්‍ය පූජාව පවත්වනු ලැබුවේ, 1975 දෙසැම්බර් 24 වෙනි දින මධ්‍යම රාත්‍රියේ දී යි. ඒ අනුව 2024 දෙසැම්බර් 24 වෙනි දින මධ්‍යම රාත්‍රියේ උන්වහන්සේ, කටුනායක අප ස්වාමිදූගේ සිද්ධස්ථානයේ, දර්ශණ දෙව් මැදුර තුල දී පුද කරනු ලැබුවේ, සිය අපොස්තුළු දිවියේ පනස් වෙනි නත්තල් මංගල දිව්‍ය පූජාවයි. වසර පනහකට පෙර ශුද්ධෝත්තම අපොස්තුළුතුමා ප්‍රථම නත්තල් දිව්‍ය පූජා මෙහෙය පවත්වනු ලැබූ ස්ථානයේ ම, මෙදා පනස් වෙනි නත්තල් මංගල පූජාව පැවැත්වීම ද විශේෂත්වයක්.

ඒ වගේම තවත් කිව යුතු ම කරුණක්. ජේසුස් ක්‍රිස්තුස් වහන්සේ තෝරාගනු ලැබූ අපොස්තුළුතුමන්ලා අතරින්, අපොස්තුළුතුමෙකු ලෙස මේ වන විට අවුරුදු පනහක් ජීවත් වූ දෙවන අපොස්තුළුතුමා වන්නේ, ශුද්ධෝත්තම රොහාන් ලලිත් අපොන්සු අපොස්තුළුතුමයි. අපොස්තුළු දිවිය තුල අවුරුදු පනහක් ජීවත් වූ පළමු අපොස්තුළුතුමා වූයේ ශුද්ධෝත්තම ජුවාම් අපොස්තුළුතුමා වන අතර, 2025 පෙබ්‍රවාරි 7 වෙනි දිනය මේ වන විට පසුකර සිටින අප ශ්‍රී ලාංකික ප්‍රථම අපොස්තුළුතුමා වන ශුද්ධෝත්තම රොහාන් ලලිත් අපොන්සු අපොස්තුළුතුමා, අවුරුදු දෙදහසකට ආසන්න කාලයක් තුල, මෙළොව ජීවිතය රැකගත් ඒ පළමුවන අපොස්තුළුතුමාගේ වාර්තාව මේ වන විට බිඳ දමා තිබෙනවා.

ජේසුස් ක්‍රිස්තුස් වහන්සේ මෙළොව ජීවත්ව සිටිය දී තෝරාගනු ලැබූ අපොස්තුළුවරු දොළොස්දෙනා අතරින් එක් අයෙක් වූ ජුදාස් සිය දිවි හානිකරගනු ලැබූ අතර, ශුද්ධෝත්තම ජුවාම් අපොස්තුළුතුළුතුමා හැරුණකොට අනික් සියළුම අපොස්තුළු තුමන්ලා මරා දමනු ලැබුවා. උතුරන තෙල් කටාරමක් තුල ගිල්වා ශුද්ධෝත්තම ජුවාම් අපොස්තුළුතුළුතුමන්ව ද මරා දමන්නට උත්සහ කරනු ලැබුවත්, එය ව්‍යර්ත වූ නිසා, ඒ මොහොතේ උන්වහන්සේ මරණයෙන් බේරුණා. පසුව ශුද්ධෝත්තම ජුවාම් අපොස්තුළුතුළුතුමා මිනිසුන්ගෙන් වෙන් වී, ජන ශුන්‍ය ප්‍රදේශයක තනිව හුදකලාව ජීවත් වීමට පටන් ගත්තා. ඒ නිසාම අවුරුදු සියයකටත් වැඩිකාලයක් ජීවත්ව ස්වභාවික අන්දමින් අභාවප්‍රාප්ත වුනා.

ජේසුස් ක්‍රිස්තුස් වහන්සේ දර්ශණය වී තෝරාගනු ලැබූ පළමුවන අපොස්තුළුතුමා වූ ශුද්ධෝත්තම පාවුළු අපොස්තුළුතුමාව තොරාගනු ලැබුවේ ක්‍රිස්තු වර්ෂ 35 දී පමණ වන අතර, ක්‍රිස්තු වර්ෂ 65 දී හිස කඳින් වෙන්කර මරා දමනු ලැබූ බැවින්, එම අපොස්තුළුතුමන්ට ද, අපොස්තුළුතුමෙක් ලෙස මෙලොව ජීවත් වන්නට ලැබුණේ වසර තිහක් වැනි කාලයක් පමණයි.

1975 පෙබ්‍රවාරි 7 වෙනි දින, ‘අපොස්තුළුවරය’ නැමැති දිව්‍ය පත්වීම ලැබූ ශුද්ධෝත්තම රොහාන් ලලිත් අපොන්සු අපොස්තුළුතුමා මේ ලෝකයේදී ක්‍රිස්තුභක්තිකයෙකුට ලබාගත හැකි, අති ශ්‍රෙෂ්ඨ, ඉහළම පත්වීම ලබාගැනීමට හිමිකම් ලැබූවා. සියළු ක්‍රිස්තියාණින්ගේ නායකයාණන් වන ජේසුස් ක්‍රිස්තුස් වහන්සේ විසින්ම දානය කරනු ලැබූ මෙම පත්වීම, වර්ෂ දෙදහස් විසිහතරක් තුල ලබාගෙන ඇති සංඛ්‍යාව දසසතර දෙනෙක් පමණයි. අවසානයට අපොස්තුළුවරයෙන් පිදුම් ලද දසසතරවැන්නා වූයේ, දැනට කටුනායක අප ස්වාමිදූගේ සිද්ධස්ථානයේ වැඩසිටින ශුද්ධෝත්තම රොහාන් ලලිත් අපොන්සු අපොස්තුළු තුමාණෝයි.

2024 දෙසැම්බර් 24 වෙනි දා මධ්‍යම රාත්‍රියේ ඇරඹි නත්තල් දිව්‍ය පූජා මෙහෙය ආරම්භ කිරීම සදහා ශුද්ධෝත්තම රොහාන් ලලිත් අපොන්සු අපොස්තුළුතුමා ඉතාමත් සන්සුන් ගමනින් දර්ශණ දෙව්මැදුරට පිවිසියා.

රන්වන් පූජා ඇඳුමින් සැරසී සිටි ශුද්ධෝත්තම අපොස්තුළු තුමා, ‘බෙත්ලෙහෙම් ජේසු බිළිඳු ප්‍රතිමාවෙන්’ සියළුම බැතිමතුන්ව ආසිරි ගන්වනු ලැබුවා.

නිර්මල කන්‍ය මරිය මාතාවෝ ශ්‍රී ලංකාවේ දී ප්‍රථම වරට දර්ශණය වූයේ 1975 පෙබ්‍රවාරි 5 වෙනි දිනයි. ශුද්ධෝත්තම රොහාන් ලලිත් අපොන්සු අපොස්තුළුතුමන් ඉදිරියේ ජීවමානව ම පෙනී සිටි ඒ ස්වර්ගීය උත්තමාවිය මෙතෙක් ගෙවීගිය පනස් වසරක් තුල 23 වතාවක් දර්ශණය වී තිබෙනවා. මරිය මාතාවන්ගේ ප්‍රථම දර්ශණයට අඩසිය වසරක් සපිරුණ මේ ස්වර්ණ ජුබිලි වර්ෂය තුල දී ඒ උත්තමාවිය නැවතත් අප මධ්‍යයේ දර්ශණය වනු ඇතැයි බොහෝ සැදැහැවතුන් අපේක්ෂාවෙන් පසුවෙනවා.

2023 සැප්තැම්බර් 16 වෙනි සෙනසුරාදා දින සවස කටුනායක අප ස්වාමිදූගේ සිද්ධස්ථානයේ, ශුද්ධවූ පේදුරු සහ පාවුළු අපොස්තුළු උයනේ දී රැස්ව සිටි සැදැහැවතුන් අමතා ශුද්ධෝත්තම අපොස්තුළුතුමන් පවත්වනු ලැබූ දේශණයේ දී උන්වහන්සේට නිර්මල මරිය මාතාවන් ප්‍රථම වරට දර්ශණය වූ අවස්ථාව සම්බන්ධව විස්තර කරනු ලැබූ අතර, මෙහි පලවන්නේ ශුද්ධෝත්තම අපොස්තුළුතුමන්ගේ එම දේශණය යි.

මාගේ ප්‍රේමවන්ත පිංවත් දරුවෙනි,

දුර මග ගෙවාගෙන බොහෝ පැතුම්, ගැටළු දේව මෑණියන්ට ඔප්පු කිරීම සඳහා සුදුසුම ස්ථානය සොයාගෙන පැමිණි ඔබ සියලු දෙනාගේම ඒ උතුම් ප්‍රාර්ථනාවන් ඔබගේ විශ්වාසය පෙරදැරිකරගෙන ඉෂ්ඨ වේවායි මා ප්‍රථමයෙන් ප්‍රාර්ථනා කරනවා. මාගේ ප්‍රේමවන්ත දරුවෙනි, නිර්මල කන්‍ය මරිය වහන්සේ විසිතුන් වරක් පය ගැසු, එතුමිය දර්ශනය වු භූමියටයි ඔබ මේ පැමිණ සිටින්නේ. මම විශ්වාස කරනවා ඔබ ඒ බව විශ්වාස කරගෙනයි මේ මොහොතේ මා ඉදිරිපිට වාඩි වී සිටින්නේ කියලා. ඒ විශ්වාසය ඇතුවයි අද මා මේ මොහොතේ ඔබව අමතන්නේ. ඔබ මේ සිද්ධස්ථානේදී නිර්මල කන්‍ය මරිය වහන්සේ තුන් වරක් නොවෙයි, දහතුන් වරක් නොවෙයි, විසිතුන් වරක් දර්ශනය වූ බව විශ්වාසය ඇතුවයි මේ රැඳී සිටින්නේ කියන විශ්වාසය මගේ හිතේ තියාගෙනයි මම ඔබට කථා කරන්නේ. මොකද එවැනි විශ්වාසයකින් තොරවනම් ඔබ ඉන්නේ, මේ කියන්නට යන කිසිවක් ඔබට සුදුසු වෙන්නෙ නැහැ. එවැනි විශ්වාසයක් නැත්තම් එවැනි අයට හරියන්නේ වෙනත් ප්‍රකාශයක්, වෙනත් දේශනයක්.

ප්‍රේමවන්ත දරුවෙනි, 1975 පෙබ්‍රවාරි මාසයේ 5 වෙනිදා සවස නිර්මල කන්‍ය මරිය වහන්සේ පළමුවන වරට මා හට දර්ශනය වු අවස්ථාව, ඇත්තටම එතුමියව මට හමුවු අවස්ථාව, ජීවිතේ පළමු වරට එතුමිය හමු වු අවස්ථාව මට අද වගේ මතකයි. අමතක කරන්න බැහැ. කාටද අමතක කරන්න පුළුවන්. මේ වෙලාවෙ ඔබ මගෙන් අහන්නට පුළුවන් මෙහෙම දෙයක්. “පියාණෙනි, අපිට කියන්න ඔබවහන්සේට ඒ වෙලාවෙ මොනවද හිතුනෙ? නිර්මල කන්‍ය මරිය වහන්සේ ජීවමානව ඔබවහන්සේ ඉදිරියේ පෙනී සිටිද්දි, ඔබවහන්සේට මොනවද හිතුනෙ? කියන්ඩ කියන්ඩ පියාණෙනි.” ඉතින් එයට මං මෙහෙම පිළිතුරු දෙන්න කැමතියි. ඇත්තටම මට මොකුත් හිතුනෙ නෑ. මට හිතුනෙ එක දෙයයි. ‘ආ දේව මෑණියො’. මෙවැනි අවස්ථාවක් ඔබගේ ජීවිතයේ, නිකම් හිතලා බලන්ඩ ඔබට මෙවැනි අවස්ථාවක් ආවොත් මොනව හිතෙයිද? ඔය ටිකම තමයි හිතෙන්නේ. ‘ආ දේව මෑණියො’. එදා ඒ දර්ශනය, එතුමිය කථා කරපු දේවල් මම කිව්ව දේවල් මම අහගෙන හිටියා මිසක් කිසිවක් මම අහන්නට ගියේ නැහැ. ජීවිතයේ පළමු වතාවට මරිය මෑණියන් හමුවීම එක්තරා විදිහක තිගැස්මක් ඇති නොවුනා නොවෙයි. කුමක්ද මේ? එදා එතුමිය කිව්ව දේවල් අහගෙන, බොහෝම කෙටි වගන්ති දෙකයි එදා කිව්වේ. නැවත එන බවක් තුන්වෙනි වාක්‍යය හැටියට කිව්වා. ඔබ මගෙන් අර පළමු ප්‍රශ්නය ඇහැව්වනම්, මෑණියන්ව දැක්ක ගමන් මොනවද හිතුනෙ කියලා එයට පිළිතුරු ඔච්චරයි. දැන් ඔබට තව ප්‍රශ්නයක් අහන්නට හිතට එන්නට ම ඕන. “ඉතින් පියාණනි, අපිට කියන්න ඊට පස්සෙ මොනවද ඔබවහන්සේට හිතුනෙ, ඔබවහන්සේට මොනවද හිතුනෙ එතුමිය ඉවත් වෙලා ගියාට පස්සෙ? අන්න එතන තමයි නියම පිළිතුර තියෙන්නෙ. ඇත්තටම මට හිතුනෙ ඊට අවුරුදු ගණනාවකට කලින් ප්‍රතිමාවක් පෙන්වලා මගේ අම්මා මට කිව්ව වාක්‍යයක්. “පුතේ මේ තමයි දේව මෑණියො” ඒ කතාව කෙටියෙන් මෙහෙමයි. මට වයස අවුරුදු 4 දි, මගේ මව දේව මෑණියන්ගේ ප්‍රතිමාවක් පෙන්නලා මට කිව්වා, “පුතේ මේ තමයි දේව මෑණියො” කියලා. ඉතින් එදා ඒ වයස අවුරුදු 4 පුංචි කොල්ලා, මම හිතුවා මේ ප්‍රතිමාව දේව මෑණියො කියලා. දේව මෑණියො කියන්නෙ කවුද? නැත්තම් මොකක්ද කියලා මට හැඟීමක් දැනීමක් තිබුනෙ නෑ. පෑනක් පෙන්නලා පුතේ මේක තමයි පෑන කිව්වා වගේ තමයි ප්‍රතිමාව පෙන්නලා මේ තමයි දේව මෑණියො කියලා කිව්ව කතාව. එදා 1975 පෙබ්‍රවාරි 5 වෙනිදා සවස පළමුවන දර්ශනයෙන් පස්සෙ බොහෝම කෙටි වේලාවකින්, මම කල්පනා කරද්දි මට ඔළුවට ආව පළවෙනි සිද්ධිය මගේ මව දේව මෑණියන්ගෙ ප්‍රතිමාවක් පෙන්නලා මට කිව්වා, “පුතේ මේ තමයි දේව මෑණියො” කියලා. නමුත් අවුරුදු 4 කොල්ලා ඊට පස්සේ ටික ටික වයසින් වැඩෙද්දි දේව මෑණියො කියන්නෙ ප්‍රතිමාවක් නොවන බව දැනගෙන තිබුනා. 1975 පෙබ්‍රවාරි 5 වෙනිදා ඔය පළමු දේව මෑණියන්ගෙ දර්ශනය සිද්ධ වෙද්දි මම දැනගෙන තිබුනා දේව මෑණියො කියන්නෙ ප්‍රතිමාවක් නොවන බවත්, එතුමිය ස්වර්ගයේ ජීවමානව ආත්ම ශරීර පිටින් වැඩ සිටින බවත්, විවිධ ස්ථාන වල මරිය තුමී යම් යම් පුද්ගලයන්ට දර්ශනය වෙලා තියෙන බවත් මම දැනගෙන තිබුනා. නමුත් ඒ දර්ශනය වීම යම් දවසක මට ද උදාවෙයි කියලා මම හිතුවෙ නෑ. කොහොමත්ම හිතුවෙ නෑ. මෙය සිද්ධ වුනේ මම බොහොම ලාබාල වයසෙදි. යම් දවසක මරණින් පස්සෙ එතුමිය දැක ගන්නට ඕන කියන අදහසක්වත්, එහෙම දෙයක්වත් ඒ කාලෙ තිබුනෙ නෑ. ඇත්තටම මම දැනගෙන තිබුනෙ අපිට පිහිටක් ඕන වෙනකොට කියන්නට ඕනා කියන්න හොඳම කෙනා තමයි කියලා මරිය තුමී. දැන් ඔයගොල්ලොත් සමහර විට ඔහොම නේද මරිය තුමී ගැන හිතන්නේ. තමුන්ට යම් කරදරයක්, යම්කිසි පීඩාවක්, යම්කිසි උපද්‍රවයක් උනහම අපිට කියන්ඩ ඉන්න හොඳම කෙනා තමයි මරිය තුමී. එතනින් එහා ඔයගොල්ලො බලන්ඩ හිතලා බලන්ඩ ඔයගොල්ලන්ගෙ අදහසක් තිබුනද කියලා, අපි හොඳට ජීවත් වෙන්න ඕනා, අපි යම් දවසක ස්වර්ගය දිනා ගන්නට ඕන, එහිදි අපිත් මේ මරිය තුමියව දකින්නට ඕන කියන අදහසක් තිබුනෙ නෑ නේද?. මට තිබුනෙත් නෑ. ඒකට හේතුව මරිය තුමීව අපිට හඳුන්වලා දුන්නු අයගෙ ඉගැන්වීම. බොහෝ දෙනෙක්ගේ කල්පනාව මරිය තුමී සම්බන්ධව ඒ විදිහයි. නමුත් මරිය තුමිය සම්බන්ධව ඊට එහා ගිය පැත්තක් තියෙනවා. අපි අන්න ඒක දැනගන්නට ඕන. ඇත්තටම මරිය තුමියව මේ විදිහට දැකගන්නට, එතුමියත් එක්ක කථා කරන්නට, එතුමියත් එක්ක හිනා වෙන්නට, ජේසුස් ස්වාමින් වහන්සේගේ බාල කාලය ගැන එතුමියගෙන් අහලා දැනගන්නට සිද්ධ වෙන තරම් එදා ඒ සිදුවීම විසිතුන් වාරයක් දක්වා දිවයයි කියලා එදානම් මම හිතුවෙ නෑ. නැවත වරක් පැමිණෙන බව ප්‍රකාශ කළාට එය විසිතුන් වරක් දිව යනවා කියලා මම හිතුවෙ නෑ. තවමත් මේ දර්ශන මාලාව ඉවර නැද්ද අපි දන්නෙත් නෑ. මොකද මම තවම ජීවතුන් අතර ඉන්නවා.

ඉතින් ප්‍රේමවන්ත දරුවෙනි, මරිය තුමියගේ ඒ පණිවිඩත් සමග කලින් කල විටින් විට සිදුවෙච්ච දේවලුත් සමග ජනතාව මෙම සිද්ධස්ථානය වටා ඇවිල්ලා, ජනතාව මෙම සිද්ධස්ථානය තුල රොක් වෙලා විවිධ පිහිට වරප්‍රසාද ලබා ගනිත් දී, එතුමිය ජනතාව වෙත, ඒ කියන්නෙ ඔයගොල්ලො වෙත දක්වපු අනුග්‍රහය පිලිබඳව ඇත්තෙන්ම මම මවිත වුනා. මරිය තුමිය දෙවියන් වහන්සේ ඉදිරියේ අප වෙනුවෙන් සිදු කරන ඒ මධ්‍යස්ථකාරී බලය පිලිබඳව, ඇත්තෙන්ම ඔබලා ලබා ගන්නාවු, ඒ මධ්‍යස්ථවීමෙන් ලබා ගන්නාවු පිහිට ගැන හිතද්දි මම මවිත වෙනවා. නමුත් එතුමියගේ ඒ මධ්‍යස්ථකාරී බලය අපට පුදුමාකාර විදිහට තේරුම් ගත හැකි සිද්ධියක් ලූක් තුමාගේ සුවිශේෂයේ පළමුවන පරිච්ඡේදයේ සඳහන් වෙනවා. ඔබට මතකයි නේද මාස 6 ක ගැබිණියකව සිටි එළිසබෙත් තුමියව දකින්නට මරිය තුමී ගියා. දන්නවා නේද ඒ සිද්ධිය. මතකද? අත උස්සන්ඩ බලන්ඩ. හොඳයි. සමහර අය දන්නෙ නෑ වගේ. හොඳයි, අද ගෙදර ගිහිල්ලා කියවලා බලන්න, ශුද්ධවු බයිබලයේ ලූකස් තුමාගේ සුවිශේෂේ පළමුවන පරිච්ඡේදය. මං මේ කියන්ඩ යන වගන්තිය 41 වෙනි වගන්තිය. එහි සඳහන් වෙනවා, “එළිසබෙත් මරිය තුමියගේ ආචාර බස් ඇසු සැනින් ඇගේ කුසෙහි දරුවා ඉපිලෙන්නට විය.” කොහොමද වැඩේ. එතකොට මරිය තුමියගේ කුසයේ ඉන්නෙ කවුද? දේව පුත්‍රයා. මනුෂ්‍ය පුත්‍රයා හැටියට එතුමියගේ කුසයේ. ඇයගේ ඥාතිවු එළිසබෙත්ගෙ කුසයේ මාස 6 ක්, සයමස් ගැබිණියක්, පණිවිඩය දුන්නේ ගාබි්‍රයෙල් දේව දූතයා, ස්නාවක ජුවාම් තුමා. කලලයට මාස 6 යි. ගාබි්‍රයෙල් දේව දූතයාගෙන් දැන ගත්තු පණිවිඩය ඔස්සේ තමයි මරිය තුමී එතුමියගේ ඥාති වන එළිසබෙත් තුමියව දැක ගන්නට ගියේ. මරිය තුමිය ගිය ගමන්ම එළිසබෙත්ට ආචාර කෙරුවයි කියලා තියෙනවා. ඊළඟට කියනවා, “එළිසබෙත්, මරිය තුමියගේ ආචාර බස් ඇසු සැනින් ඇගේ කුසෙහි දරුවා ප්‍රීතියෙන් ඉපිලෙන්නට විය” කියලා. බලන්න මරිය තුමියගේ හඬ` මරිය තුමියගේ හඬ, ඔව් මේ උඩින් ඉන්න මරිය තුමියගේ හඬ කොච්චර බලගතුද? එළිසබෙත් තුමියගේ කුසේ හිටපු දරුවා ප්‍රීතියෙන් දඟලන්නට පටන් ගත්තා. ඔව් ප්‍රේමවන්ත දරුවෙනි, එදා ඉඳන්ම මරිය තුමියගේ හඬ, අපිට අපගේ සියලු උවදුරු වලදී, අපගේ සියලු අවශ්‍යතා වලදී, එතුමියගේ හඬ තමයි අපගේ හදවත් ප්‍රීතියෙන් ඉපිලී යන්නේ. එතුමියගේ හඬ විසිතුන් වරක් ශ්‍රවණය වෙච්ච භූමියේ අපි මේ ඉන්නේ. ඒ නිසයි ඔබගේ සියලු උවදුරු වලදි විශ්වාසයෙන් ඉල්ලනකොට ඔබට සැනසීම දීලා ඔබට ප්‍රීතියෙන් ඉපිලෙන්නට සලස්වන්නේ. මේක තමයි කතාව. අදටත් ඔබේ හඬ, ඔබේ අඳෝනාව, මෙතෙන්ට ඇවිල්ලා මරිය තුමීට නගද්දි, ඔබගේ හඬින්, මරිය තුමියගේ හදවතත් දුකින් වැලපිලා ඔයගොල්ලන්ට පිහිට වරප්‍රසාද ලබා දෙනවා. අන්න ඒ ප්‍රාතිහාර්්‍යය තමයි සෑම සෙනසුරාදාවකම සවස මේ යාච්ඤාව තුලින් සිද්ධ වෙලා, ඒ යාච්ඤාවට ජනතාව අතරින්ම නමක් පටබැඳුනේ ‘හාස්කම් යාච්ඤාව’ කියලා.

ඉතින් අවසානකොට මේ ටිකත් කියන්නට ඕනා. අර මං කිව්වා නේද මගේ මව මට ප්‍රතිමාව පෙන්නලා කිව්වා කියලා “පුතේ මේ තමයි දේව මෑණියො” කියලා. ඒ ප්‍රතිමාව තවමත් මං ළඟ තියෙනවා. තවමත් මං ළඟ තියෙනවා. ඉතින් දැන් ඔයගොල්ලන්ට හිතෙන්න ඕන මගෙන් අහන්න තව ප්‍රශ්නයක්. පියාණනි, අපිට කියන්න ඒ ප්‍රතිමාවෙ තියෙන මුහුණයි ජීවමානව ඔබවහන්සේ දැක්ක මරිය තුමියගෙ මුහුණයි එක වගේ ද, නැත්තම් දෙකක් ද? ටිකක් අමාරුවෙ වැටෙන ප්‍රශ්නයක්. ඇත්තටම ඒ ප්‍රතිමාව මගේ පියා හරහා තමයි ගෙනල්ලා තිබුනෙ. මගෙ පියා බෞද්ධ. ඒ පියා තමයි ඒ ප්‍රතිමාව තෝරගෙන තිබුනෙ. ඒක දිග කතාවක්. ඒ දිග කතාව දැනට තුන් වරක් ම මම කියලා තියෙනවා. ඒ ප්‍රතිමාවෙ තිබෙන දේව මෑණියන්ගේ රූපය ඇත්තටම නිර්මාණය කරපු ශිල්පියා, ඒ කියන්නෙ දැන් අවුරුදු කීයකට ඉස්සෙල්ලා වෙන්න ඕනද? අවුරුදු 60 ගාණකට ඉස්සෙල්ලා. දැන් තව මාස කීපෙකින් මට අවුරුදු 67 යි. මම නම් එහෙම හිතන්නෙ නෑ. ඉතින් ඒ පැරණි ප්‍රතිමාවෙ, ඇත්තෙන්ම ඒ වගේ ප්‍රතිමාවක්, ඒ වගේ මුහුණක් දැන් කාලෙ ශිල්පියෙක් හදයි ද කියලා මට හිතන්නත් අමාරුයි. නමුත් ඒ ප්‍රතිමාවෙ තිබුන මුහුණට, ජීවමාන මරිය තුමියගෙ මුහුණ සමාන නෑ, මොකක්ද අසමානතාවය? ඒ ප්‍රතිමාවෙන් පෙන්නන මරිය තුමියට වඩා ඇත්තටම එතුමිය හරි ශෝභාසම්පන්නයි. ඒ නිසා එතුමිය තරුණ පාටයි. මට ප්‍රතිමා නෙලීමේ ශිල්පය තිබුනනම්, මම හදනවා මම දැක්ක මරිය තුමියගේ ප්‍රතිමාව. අවාසනාව කියන්නේ මෙතෙක් කාලයක් මරිය තුමිය ලෝකේ විවිධ තැන් වල දර්ශනය වෙලා තියෙනවා. ලූර්දුවේ වේවා, පාතිමාවේ වේවා. විවිධ ස්ථාන වල මරිය තුමිය දර්ශනය වෙලා තියෙනවා. මරිය තුමිය දැක ගත්තු කිසිම කෙනෙකුට මේ හැකියාව තිබුනෙ නෑනෙ. මේ ප්‍රතිමා නෙලීමේ මේ ශිල්පය පිලිබඳ දැනීමක් තිබුනෙ නෑ. එහෙම තිබුනනම් ඒගොල්ලො ඒ වැඩේ කරනවා. මට තිබුනනම් මමත් ඒ වැඩේ කරනවා. ඉතින් සිද්ධ වෙන්නේ ප්‍රතිමා නෙලීමේ හැකියාව ඇති ශිල්පියෙක් තෝරාගෙන, ඒ ශිල්පියාට කියලා අපිට ඕන විදිහට මේ ප්‍රතිමාව මට උවමනා පිලිවෙලට ප්‍රතිමාව නිර්මාණය කිරීම. කවුරුත් කළේ එහෙමයි. මාත් කළේ එහෙමයි. ඉතින් එය බොහෝ දුරට සමානයි කියලා කියන්නත් බෑ. කොහොමත් ඉතින් හැකිතාක් උත්සාහ කරලා තියෙනවා. ඒ උත්සාහයට මරිය තුමිය ඉහලින්ම අපිට ආශිර්වාද කරලා තියෙනවා. ඒ නිසා තමයි මේ ප්‍රතිමාව තුලින් එතුමිය ජීවමාන සලකුණු විහිදන්නේ. මෙහි ප්‍රධාන ප්‍රතිමාව දර්ශන දේව මන්දීරය තුල ස්ථාපිත කරලා තියෙනවා. ඒ ප්‍රතිමාවෙන් විටින් විට පිච්ච මල් සුවඳ විහිදෙන්නෙත් ඒ උත්සාහයට එතුමිය දක්වලා තියෙන ආශිර්වාදයයි. ඒ ප්‍රතිමා බොහෝ විට මරිය තුමියගේ ජීවමාන ස්වරූපයට බොහෝ සෙයින් සමානව සාදන්නට ලොකු උත්සාහයක් දරල තියෙනවා.

ඉතින් ප්‍රේමවන්ත දරුවෙනි, ඔබේ විශ්වාසය, ඔබේ බලාපොරොත්තුව මරිය තුමිය කෙරෙහි රඳවලා මේ සිද්ධස්ථානේදී කොහොමහරි ඔබේ යහපත් අවශ්‍යතාවය මරිය තුමියගෙන් දිනාගන්ඩ. ඒ සඳහා සතිපතා උත්සාහ කරන්න. කොතනකදි හෝ මරිය තුමිය ඔබව ස්පර්ශ කරනවා නියතයි.

උන්වහන්සේගේ පියා උපතින්ම බෞද්ධයෙකි. කටුනායක ප්‍රදේශයේ ධනවත් ව්‍යාපාරිකයෙකු වූ ජී. සී. අපොන්සු මහතාගේ සහ මාග්‍රට් අපොන්සු මැතිණියගේ පුතණුවන් ලෙස උපත ලද මේ මහා උත්තමයාණන් වහන්සේ තමන් කුඩා කල සිටම ගත කරනු ලැබුවේ සියළු සැප සම්පතින් පිරී ගිය ඉතාමත්ම සුඛෝපභෝගී ජීවිතයකි. එහෙත් උන්වහන්සේ කුඩා කළ සිට ගත කළ එම ඉතාමත් සුඛෝපභෝගී ජීවිතය අතහැර මහා දහම් ගුරුවරයෙකු ලෙස මිනිසාට අධ්‍යාත්මික විමුක්තිය සඳහා වූ දහම් මාර්ගය පෙන්වා දීමට කටයුතු කරනු ලැබීම අහඹුවක් නොව තමන් වහන්සේගේ අවසාන භවය ලෙස මේ ලෝකයට ඉපදී උන්වහන්සේ ඉටු කිරීමට අපේක්ෂා කළ කාර්යයි. එනම් 1957 පෙබරවාරි 1 වන දින මධ්‍යම රාත්‍රියේ අසිරිමත් උපතක් සමගින් මෙලොවට උපත ලද උන්වහන්සේ අපොස්තුළු තුමෙකු ලෙස දිව්‍යමය වශයෙන් මහා අධ්‍යාත්මික පරිපූර්ණ තාවයකට පත් වීම තුලින් මේ ලෝකය තුළ සිදුකල යුතු මහා දහම් මෙහෙවරයි. ශුද්ධෝත්තම රොහාන් ලලිත් අපොන්සු අපොස්තුළු තුමන්ගේ මෑණියන් වන මාග්‍රට් අපොන්සු මැතිණිය වසර 90ක් ආයු වලඳා ස්වර්ගස්ථ වීමට පෙර එතුමිය විසින් තම සිතෙහි නිධන් කර ගනිමින් තිබූ ශුද්ධෝත්තම රොහාන් ලලිත් අපොන්සු අපොස්තුළු තුමාණන්ගේ කුඩා අවධිය පිළිබඳව හෙළි කළ මහා පුදුමාකාර සිද්ධීන් අතර, මේ ශුද්ධෝත්තම අපොස්තුළු තුමන් එතුමියගේ කුසයේ පිළිසිඳ ගත් දා පටන් ම සිදු වූ අරුම පුදුම දේ මෙන්ම උන්වහන්සේ කුඩාකල ළදරු අවධියේ සිටම සිදුකළ මහා ගැඹුරු ප්‍රකාශ තුළින් ද උන්වහන්සේගේ මහා අධ්‍යාත්මික දියුණුව පිළිබඳව බොහෝ කරුණු, එදා උන්වහන්සේගේ දෙමව්පියන් වෙත දැනී තිබුන බව තේරුම් ගැනීමට හැකි වූවත්, ඒ අරුම පුදුම සිදුවීම් තුල මෙන්ම උන්වහන්සේ එදා ළදරු අවධියේ දී පවා ප්‍රකාශ කළ ඒ ගැඹුරු ප්‍රකාශවල අර්ථය වඩ වඩාත්ව අද මුළු ලෝකය වෙතම මනා ලෙස වටහා ගැනීමට හැකි වී ඇත්තේ උන්වහන්සේ මහා අධ්‍යාත්මික ගුරුවරයකු ලෙස මිනිස් සිත ධර්මයෙන් ආලෝක කරමින් මේ සමාජය වෙත සිදුකරන මහා දහම් පෙරළිය තුළින්ය. ඇතැම් අවස්ථාවන්හී උන්වහන්සේගේ බෞද්ධ පියා මේ ශුද්ධෝත්තම අපෝස්තුළු තුමන් ළදරු අවධියේ සිදු කරනු ලැබූ ඇතැම් අධ්‍යාත්මීක ගැඹුරු ප්‍රකාශයන් පිලිබඳව රැය පහන් වන තුරු සක්මන් කරමින් නිහක්‍ෂව කල්පනා කර ඇත්තේ උපතින්ම බෞද්ධයෙකු වූ ඔහුට තම පුතණුවන්ගේ මෙවැනි ප්‍රකාශයන්හි ගැඹුරු හරය තම බෞද්ධ දැනුම තුලින්ම වටහා ගැනීමට හැකි වූ නිසාවෙන් ම බව අපට පැහැදිළි වන කරුණකි. එහෙත් එදා උන් වහන්සේගේ ළදරු වියේදී පවා ප්‍රකාශ කල ඒ මහා අධ්‍යාත්මික ප්‍රකාශ වල හරය එදාටත් වඩා අද ලෝකය වෙත හෙළි වී හමාරය. මේ සෑම දෙයක් තුලින්ම පැහැදිළි ලෙස ප්‍රකාශ වන කරුණක් වන්නේ, මේ මහා දහම් ගුරුවරයාණන් වහන්සේ ගේ මෙලොව ඉපදීම අහඹුවක් නොවන බව නොවේද? තමන් වහන්සේට දෙමාපිය උරුමයෙන් හිමි වූ සියළුම ධනය තම දහම් මෙහෙවර වෙතම යොදවමින් කටයුතු සිදුකරන උන්වහන්සේ අදටත් ඉතාමත්ම ශුද්ධවත් ඇතුළාන්ත ජීවිතයක් ගතකරන සේක. එමෙන්ම උන්වහන්සේ තම ජීවිත ආදර්ශයෙන් මෙන්ම සෑම දහම් දෙසුමකින්ම කිසිදු ජාති ආගම් භේදයකින් තොරව සමාජය වෙත අවධාරණය කරන්නේ නිරතුරුවම යහපතෙහි හැසිරෙන ලෙසටයි. ඒ වගේම මරණය පරාජය කර විමුක්තියේ පරිපූර්ණතාවය සඳහා මග පෙන්වා දීමටයි.

සැබවින්ම මෙලොවට අධ්‍යාත්මික ගුරුවරයෙකුගේ පහළ වීම අහම්බයෙන් සිදු වන්නක් නොවේ. එමෙන්ම අධ්‍යාත්මික ගුරුවරයෙකු මෙලොවට පහළ වන්නේ මිනිසාගේ දැනුම පිණිස නොව අවබෝධය පිණිස දහම් මඟ පෙන්වා දීම සදහාමය. මන්ද යමෙකු තම අධ්‍යාත්මික පරිපූර්ණතාවය සඳහා මාර්ගය සොයා ගත යුත්තේ බාහිර ලෝකයෙන් නොව තමන් තුළින්මයි. සිතෙහි පවතින කෙලෙස් දුරු කර තම සිත අධ්‍යාත්මික පරිපූර්ණතාවය වෙත යන මාර්ගය තුළ ගමන් කරවිය යුත්තේ තමන් විසින්මයි. ඒ සඳහා සැබැවින්ම තමා තුළින් ම අවබෝධයෙන් වටහා ගත යුතු නිවැරදි දහම් මගපෙන්වීමක් අත්‍යාවශ්‍ය වේ. මේ සඳහා නිවැරදි. දහම් අවබෝධය යමෙකුගේ සිත තුළට දී තම ඇතුළාන්තය තුළින්ම අධ්‍යාත්මික විමුක්තිය සඳහා මාර්ගය සොයා ගැනීමට උදව් කළ හැක්කේ උතුම් ආධ්‍යාත්මික ගුරුවරයකුටම පමණයි. ඒ නිසාම ශුද්ධෝත්තම රොහාන් ලලිත් අපොන්සු අපොස්තුළු තුමන් වැනි මහා අධ්‍යාත්මික ගුරුවරයෙකු මෙලොව වැඩ වසන සමයක උන් වහන්සේ පෙන්වා දෙන මහා දහම් අවබෝධයෙන් තම සිත පෝෂණය කරගෙන අධ්‍යාත්මික විමුක්තිය වෙත ගමන් කිරීමට හැකිවන මාර්ගය තමන් තුළින්ම වටහා ගැනීමට අවස්ථාව ලැබීම ද අද බොහෝ දෙනෙකුට හිමිවී ඇති මහඟු වූ වටිනා අවස්ථාවක් වීම ඔවුන්ගේ ම පෙර පිනකට ලද වාසනාවක් විය යුතුය.

යමෙකුට මෙලොව සිදු කළ හැකි උතුම්ම ප්‍රාතිහාර්ය වන්නේ අන් කිසිවක් නොව අධර්ම මාර්ගය තුළ මුලාවී ඇති සිතකට නිවැරදි දහම් අවබෝධය ලබා දෙමින් ඒ සිත ධර්මයෙන් සුවපත් කර, තම මරණය පරාජය කර ලබාගත හැකි විමුක්තියේ මාවතේ ගමන් කිරිමට අවස්ථාව ලබා දිමයි. ලෝකයට පහළ වන අධ්‍යාත්මික ගුරුවරයකු සැබැවින්ම මේ ප්‍රාතිහාර්යය සිදුකිරීමට සමත්වන උතුම් දහම් ගුරුවරයෙකු වන්නාහ. ඒ නිසාම විශේෂයෙන්ම මේ ශුද්ධෝත්තම අපොස්තුළු තුමන්ගේ දහම් දූත මෙහෙවර තුළ අවධානය යොමු කරන කළ, කටුනායක අප ස්වාමිදූගේ සිද්ධස්ථානයේ වැඩ වසන මේ මහා දහම් ගුරුවරයාණන් වහන්සේ පුරා දශක පහකටත් වැඩි (අවුරුදු පනහකටත් වැඩි) තම දහම් දූත මෙවර තුළ, මිනිස් සිත යහපත් වූ ගුණ ධර්ම වලින් පෝෂණය කරවමින් ඔවුන්ව දහම් මාවත ඔස්සේ ගමන් කරවීමට කටයුතු කරවූයේ යමෙකුට මේ ලෝකය තුළ සිදු කළ හැකි උතුම්ම ප්‍රාතිහාර්ය වන මිනිස් සිත ධර්ම මාර්ගය තුළ ගමන් කරවීමේ ප්‍රාතිහාර්ය සිදුකරමින් වීම පැහැදිලිව වටහාගත හැකි කරුණකි. ඒ නිසාම අදටත් බොහෝ බෞද්ධ නාහිමිවරුන් වහන්සේලාගේ පවා ගෞරවාදරයට පත් වන අප ශුද්ධෝත්තම රොහාන් ලලිත් අපොන්සු අපොස්තුළු තුමා යනු මේ ලෝකයට ම හිමිවූ මහා වටිනා දහම් සම්පතක්ය. නිසැකවම කිසිදු ජාති ආගම් භේදයකින් තොරව, සැමගේ ගෞරවාදරයට පාත්‍ර විය යුතු උත්තමයෙකි. එහෙත් යම් දිනයක උන්වහන්සේ මේ ලෝකයෙන් වියෝ වූ දිනයක උන් වහන්සේ පෙන්වා දුන් අධ්‍යාත්මීක විමුක්තියේ මාර්ගයේ ගමන් කරන්නට උන්වහන්සේගේ පා සලකුණු පමණක් මේ ලෝකයට ඉතිරි වනු ඇත. එදිනට මේ ලෝකයට අපොස්තුළු තුමෙකු නම් වු මහා අධ්‍යාත්මික ගුරුවරයාණන්ගේ අගය අදටත් වඩා වැඩි වැඩියෙන් එදිනට දැනෙනු ඇති බව නිසැකය.

රංග ප්‍රසාද් පෙරේරා
ජාඇල

2024 ජූනි මස 29 වෙනි සෙනසුරාදා සවස ශුද්ධෝත්තම රොහාන් ලලිත් අපොන්සු අපොස්තුළුතුමා ඉහත වදන් ප්‍රකාශකරනු ලැබුවේ, මීගමුවේ පදිංචි වෙනීරියස් ප්‍රනාන්දු සහ සෙල්වින් ප්‍රනාන්දු යුවලගේ විවාහ ජීවිතයේ තිස් වෙනි සංවත්සරය වෙනුවෙන්, ශුද්ධෝත්තම අපොස්තුළුතුමන්ගේ ප්‍රධානත්වයෙන් කටුනායක අප ස්වාමිදූගේ සිද්ධස්ථානයේ දර්ශණ දෙව්මැඳුරේ දී පවත්වනු ලැබූ දිව්‍ය පූජා මෙහෙයේ දේශණය පවත්වමිනුයි.

ශුද්ධෝත්තම අපොස්තුළුතුමා තව දුරටත් සිය දේශණයේ දී මෙසේද ප්‍රකාශ කල සේක.

‛‛ඔබ දෙදෙනා වසර ගණනාවක් විවාහ සංවත්සරය මාත් සමග මෙලෙසම පවත්වලා අද 30 වෙනි සංවත්සරය මෙලෙස පවත්වන්නට හැකි වූයේ ඔබලා දෙදෙනා ඒ සියලු අවවාදයන් පිලිපැදලා විවාහ ජීවිතය ආලෝකමත් කර ගත් නිසයි. ඉතින් වෙනේරියස් සහ සෙල්වින් ප්‍රිය දරුවෙනි ඔබ දෙදෙනා අතර තිබු ඒ හික්මීම නිසා ඔබ දෙපලගෙන් මේ ලෝකයට ලැබුන දරුවන්ගේ ජීවිතත් ආලෝකමත් වෙලා තිබෙනවා. මොකද ඔබ දෙදෙනා දිහා බලලා හැදෙන්ඩ බොහෝ දේවල් දරුවන්ට තිබුනා. එහෙම නේද? ඔබ දෙදෙනා දිහා බලලා හැදෙන්ඩ දේවල් දරුවන්ට තිබුනා. අම්මා තාත්තා කියන්නෙ ගෙදරක ඉරයි හඳයි වගෙ. ප්‍රධාන ආදර්ශ දෙක අම්මයි තාත්තයි. නමුත් අම්මයි තාත්තයි නයයි පොළඟයි වගේනම්, මහා විස දෙකක් වගේනම්, මේ විස දෙක එකතු වෙලා හැදෙන උග්‍ර විස කොහොම වෙයිද? මොකද එකිනෙකාගෙ ජීවිතයන්ට ගරු නොකරන දෙන්නෙක් ගෙදර අධිපතිකම දරද්දි දරුවන්ගෙ ජීවිත වලට මොකක් වෙයිද? වෙනේරියස් සහ සෙල්වින් ප්‍රිය දරුවෙනි, ඔබ දෙදෙනාගේ විවාහයට දැන් අවුරුදු 30ක් සම්පූර්ණව ඇතත් අවුරුදු 30 කට කලින් සිටම මම ඔයගොල්ලන්ව හඳුනනවා. ඔයගොල්ලො දෙදෙනාම මේ සිද්ධස්ථානය සමග සම්බන්ධ වෙලා හිටියා. සෑම දේව මෙහෙයකටම සහභාගි වුනා විතරක් නෙමෙයි, සිද්ධස්ථානයේ බාහිර කටයුතු සමගද සම්බන්ධව සිටියා. මේ වෙනකොට ඔබේ අනර්ඝ වස්තූන් වන ඔබ දෙපලගේ දරුවන්ද ඒ කටයුතු සඳහා නොමසුරුව සම්බන්ධ කරල තිබෙනවා. ඔයගොල්ලන්ගේ එකම පුතාව පවා සම්පූර්ණෙන්ම දේව සේවයට සම්බන්ධ කිරීමට තරම් නොමසුරුබවක් ඒ කියන්නෙ කිසිදු මසුරුකමක් නැති බවක් ඔයගොල්ලො දෙදෙනාටම තිබුනා. ඔයගොල්ලො දෙදෙනාම මසුරු වුනානම් ඒක කරන්න බැරුව යනවා. එක්කෙනෙක් මසුරු වෙලා අනික් එක්කෙනා පරිත්‍යාගිශීලි වූවානම් ඒත් ඒ ටික කරන්නට බැරුව යනවා. ඇතැම් අයගේ ජීවිත පැවතුම් දිහා බලද්දී අද සමාජයේ ජීවත් වන වැඩි දෙනෙක් හරිම මසුරුයි. තමන්ට අයිති දේවල් පොඩ්ඩක්වත් අනික් අයට දෙන්නට විතරක් නොවෙයි, තමන්ගෙ දේවල් චුට්ටක්වත් වෙනත් කෙනෙක් පරිහරණය කරනවා දකින්නවත් අකැමතියි. නමුත් ඔයගොල්ලො දෙදෙනාම තුල ඒ මසුරුකම දකින්නට තිබුනේම නැහැ. අපේ සිද්ධස්ථානයේ විවිධ අවශ්‍යතා සඳහා ඔබලා දෙදෙනාම කිසිම මසුරුකමක් නැතිව උපකාර කරපු ආකාරය හොඳටම දන්නේ උඩ ඉන්න දෙවියොත් මේ බිම ඉන්න මමත් විතරයි කියල කිව්වොත් ඒක නිවැරදි බව ඔයගොල්ලො පිලිගන්නවා ස්ථීරයි. ඒ බව ඔබේ දරුවන්ටත් දායාද වෙලා තියෙනවා. ඔයගොල්ලො දෙදෙනාගේ ඒ යහපත් ගුණාංගය, ඒ යහපත් ආදර්ශය දරුවන්ට පෙනිලා තියෙනවා, දරුවන්ට දැනිලා තියෙනවා. වෙනේරියස් සහ සෙල්වින් ප්‍රිය දරුවෙනි, ඔබ දෙදෙනා සතු ඒ නොමසුරුබව හෙවත් පිනක් කරගන්නට ලැබෙන අවස්ථාවේදි මසුරු නොවී සිටීමේ ගුණාංගය අද සමාජයේ බොහොම දෙනෙකුට නැති දෙයක්. සමහරුන්ටනම් ඇත්තේම නෑ.’’

වෙනේරියස් ප්‍රනාන්දු මහතා සහ සෙල්වින් ප්‍රනාන්දු මහත්මිය වසර තිහකට පෙර විවාහ ජීවිතයට ඇතුළු වූයේ කටුනායක අප ස්වාමිදූගේ සිද්ධස්ථානයේ පැරණි දර්ශණ දෙව්මැඳුරේ දී ශුද්ධෝත්තම රොහාන් ලලිත් අපොන්සු අපොස්තුළුතුමන්ගේ ප්‍රධානත්වයෙන් සිදු කරනු ලැබූ විවාහ මංගල දිව්‍ය පූජාවේ දී උන්වහන්සේගේ ආශිර්වාදය ලබා ගනිමිනුයි. වසර තිහක් ගතවන අවස්ථාවේ, පැරණි දර්ශණ දෙව්මැඳුර පැවති ස්ථානයේ ම ඉදිකර ඇති නව දර්ශණ දෙව් මැඳුර තුල දී, ශුද්ධෝත්තම අපොස්තුළුතුමන්ගේ දෝතින් පුදනු ලැබූ තිස්වන විවාහ සංවත්සර දිව්‍ය පූජා මෙහෙයට, මෙම යුවල සහභාගි වූයේ සිය දරු තිදෙනා ද සමගිනුයි.

ඔවුන් සියළු දෙනා ද, මෙම දිව්‍ය පූජා මෙහෙයට සහභාගි වූ විවිධ ප්‍රදේශයන්ගෙන් පැමිණ සිටි සැදැහැවත් ජනතාව ද අමතමින් ශුද්ධෝත්තම රොහාන් ලලිත් අපොන්සු අපොස්තුළුතුමා තව දුරටත් මෙලෙසින් ද පැවසූ සේක.

‛‛මේ වගේ දේශනාවක් අහගෙන ඉන්නකොට තමන් දිහායි බලන්නට ඕනා. දහම් දෙසුමක් කියන්නෙ, අපොස්තුළුතුමෙක්ගේ අනුශාසනාවක් කියන්නෙ, ඔබට ඔබ දෙසම බලාගන්නට අතට දෙන කණ්නාඩියක්. ඉතින් මේ කණ්නාඩිය එක එක්කෙනාට අල්ලන්නට එපා. අරගොල්ලො ගැන තමයි කිව්වෙ, ඒගොල්ලො ගැන කිව්ව ටිකනම් හරියටම කිව්වා, අරගොල්ලන්ටම තමයි දේශනාව ගැලපෙන්නෙ. එහෙම හිතන්න එපා. අනික් අයගෙ ඒවා වැඩක් නැහැ මෙතෙන්ට. බලන්ඩ තමන් දිහා. මේ කියන්නෙ, මේ ප්‍රශ්ණෙ, මේ කියන්නෙ අපේ ප්‍රශ්ණෙ. අපි දෙන්නම මේ ගති සහිතද, අපි දෙන්නම තද මසුරොද, තමන් ගැන කල්පනා කරන්න. වෙනීරියස් සහ සෙල්වින් යුවලට නෙමෙයි ඒ ටික කිව්වෙ, මේ රැස්වී සිටින සියලු දෙනාටම. ඔබ සියලු දෙනාටමත් එක්කයි මේ දේශනය පවත්වන්නේ. වෙනීරියස් සහ සෙල්වින් විවාහ ජීවිතයේ වසර තිහක් සමරණ මේ මොහොතේ මේ වගේ දේවල් ඇහෙනකොට, ඔයගොල්ලෝ දෙදෙනාගේ විවාහ බන්ධනය ආශිර්වාද කල මා විසින් ම අවුරුදු තිහකට පස්සෙ, ඔයගොල්ලෝ දෙදෙනාගේ ජීවිත දෙස අවුරුදු තිහක් බලාගෙන සිටපු මා විසින් ම මේ වගේ දේවල් කියත් දී, මේ වගේ මසුරුකම් ඔයගොල්ලන්ට නැත කියලා දැනෙනකොට කොච්චර සතුටක් දැනෙනවද නේද? අපි මෙහෙම අය නෙමෙයි, අපි දෙන්නා මසුරො නෙමෙයි කියලා කොච්චර සතුටක් දැනෙනවද? අපොස්තුළුතුමා කියන මේ මසුරු දුර්ගුණ අපි ලඟ නෑනෙ, අපි කොච්චර වාසනාවන්ත ද, අපි මෙහෙම අය නෙමෙයි නෙ, අපි මසුරො නෙමෙයි නෙ, කොච්චර සතුටක් දැනෙනවද? මා දෙසූ ධර්මය අසා ඒවා පිළිපැදීමේ ප්‍රයෝජනය අන්න ඒකයි. ඒ නිසාම විවාහයෙන් දශක තුනකට පස්සෙ, කෙටි කාලයක් නෙමෙයි, අවුරුදු තිහකට පස්සෙ, ඔබලා දෙදෙනාටම අද සතුටු වෙන්න පුළුවන්, ‛අපි කොච්චර කොලිටි ද කියලා’.

සිය විවාහ දිවියේ තිස් වෙනි සංවත්සරය සමරමින්, දිව්‍ය පූජා මෙහෙයේ දී වෙනේරියස් ප්‍රනාන්දු මහතා සහ සෙල්වින් ප්‍රනාන්දු මහත්මිය විසින් රන් ආලේපිත වටිනා පූජා පාත්‍රයක් ශුද්ධෝත්තම අපොස්තුළුතුමන්ට පූජා කරනු ලැබූ අතර එදින විවාහ සංවත්සර දිව්‍ය පූජාවේ දී උන්වහන්සේ පාවිච්චි කරනු ලැබුවේ එම පූජා පාත්‍රයයි.

විවාහ වූ යුවලකට පමණක් නොවෙයි, විවාහ වීමට සිටින අයට පවා ඉගෙන ගැනීමට බොහෝ කරුණු ඇතුලත්ව සිය දේශණය කරනු ලැබූ ශුද්ධෝත්තම රොහාන් ලලිත් අපොන්සු අපොස්තුළුතුමා වැඩි දුරටත් මෙලෙසින් ද ප්‍රකාශ කරනු ලැබුවා.

‛‛අද සමාජය දිහා බලත් දී මේ ටිකත් කියන්නට ඕනා. යම් ගෙදරක අම්මා අසංවර නම්, ඒ ගෙදරට ඒක මහා සාපයක්. ඒක හරිම නරක තත්වයක්. ඒක නම් වලක්වා ගන්නටම ඕනා. දුවෙකුට වුනත්, තමන්ගෙ සීමා ලකුණු කරගන්නට උදව් කරන්නට ඕනා කවුද? අම්මා. අම්මා නැත්නම් දුවෙකුට කවුද යහපත් පැවැත්ම ගැන කියල දෙන්නෙ. මම මෙහෙම ඉඳලා, මේ වගේ වැඩ කරලා, මේ වගේ හැසිරිලා, මේ වගේ ගමන් ගිහිල්ලා අම්මගෙ මුහුණ බලන්නෙ කොහොමද? අම්මට මුහුණ දෙන්නෙ කොහොමද? අම්මගෙ මුහුණෙ දැලි ගාන්නට බැහැ. දුවෙකුට මෙහෙමයි හිතෙන්නට ඕනා. ඉතින් දුවෙකුට එහෙම හිතෙන්නටනම්, අම්මා ශීලාචාර, ගුණවත්, විනීත, ආදර්ශමත්, ධර්මය ඉදිරියේ ඇත්තටම හීලෑ වුන අම්මා කෙනෙක් වෙන්නට ඕනා. ධර්මය ඉදිරියේ ඇත්තටම හීලෑ වුන අම්මා කෙනෙක් වෙන්නට ඕනා. දුවෙකුට වැදගත්ම දේ අම්මාට මුහුණ දීම. අම්මාගේ සංවරකම ඉදිරියේ තමයි දුවෙක් වුනත් පුතෙක් වුනත් කොන්ද කෙලින් තියාගෙන ඉන්නෙ. යම් ගෙදරක අම්මා දුෂ්ශීලයි කියන්නෙ, කෙටියෙන් කියනවනම් යම් ගෙදරක අම්මා ‛වනචරයි’ කියන්නෙ, ‛සල්ලාලයි’ කියල කියන්නෙ, ප්‍රිය දරුවෙනි, ඒක මහා විනාශයක්. ඒ ගෙදර දරුවන්ට විතරක් නෙවෙයි, මුළු සමාජයට ම විනාශයක්. කිසිම අම්මෙක් කවදාක්වත් ඒ තත්වයට වැටෙන්නට එපා. අද විවාහ ජීවිතයේ තිස්වසර සමරණ සෙල්වින් අම්මා කෙනෙක් වශයෙන් දියණියන් දෙදෙනාටත්, එකම පුතාටත් ඔබ මහා ආදර්ශයක්. ධර්මය අසා ඇත්තටම හීලෑවුන කාන්තාවක්. එවැනි බිරිඳක් සමග වසර තිහක් ගතකල වෙනේරියස්ටත්, තාත්තා කෙනෙක් වශයෙන් කොච්චර සතුටක් ද? මගේ බිරිඳ ගැන සමාජය වැරැද්දක් කියන්නෙ නෑ, මගේ බිරිඳ ගැන සමාජය ඇනුම්පද කියන්නෙ නෑ, එහෙම කියලා ස්වාමි පුරුෂයෙක් හැටියට තමන්ගේ බිරිඳ ගැන ආඩම්බර වෙන්න පුළුවන්. ඇයි දරුවන්ට? දරුවන්ටත් තමන්ගෙ අම්මා ගැන ආඩම්බරයෙන් කතා කරන්නට පුළුවන්. සමාජයේ කවුරුවත් දරුවන්ට කියන්නෙ නෑ, ‛මේ ඔයගොල්ලන්ගෙ අම්මා……. අපි දන්නවා එයාගෙ හැටි’ එහෙම කියන්නෙ නැහැ. ආදර්ශමත් අම්මා කෙනෙක්. අම්මයි තාත්තයි දෙන්නාම ආදර්ශවත් දෙමාපියන් ලෙසටයි, අද දින දරුවන් තුන්දෙනාවම ලඟින් තියාගෙන, අවුරුදු තිහකට කලින් විවාහ බන්ධනය ආශිර්වාද කල මාවත් ඉදිරියේ තබාගෙන ජීවිතයේ දුර්ලභ අවස්ථාවක් සමරන්නෙ. නමුත් අද සමාජයේ සියළුම කාන්තාවන්ටයි මම මේ කථා කරන්නෙ දැන්. අද සමාජයේ සියලුම කාන්තාවන් පරෙස්සම් වෙන්න. ඔය එක එකා යූටියුබ්වල ෆේස්බුක්වල දාන කතා පිංතූර දැක්කහම හිතෙනවා, මුං මේ වගේ දේවල් දාලා ගෙදර ගිහිල්ලා තමන්ගෙ දුවගෙ මුහුණ බලන්නෙ කොහොමද කියල. මෙවැනි අය බලන්නෙ අනික් අයගෙ පවුල් ජීවිතත් අවුල් කරන්න. ඇයි තමන්ගෙ මුළු පවුල් ජීවිතයම ගිනි අරගෙන. එවැනි මෝඩ, මනස අවුල් වුන අයගෙ මෝඩ කතා, පිස්සු කතා අහලා, පුංචි රෙදි කෑල්ලකින් මසා ගත්ත ඇඳුම් මෝස්තර දැකලා, අපේ අම්මලා, අපේ කාන්තාවන් කවදාකවත් ඒවා ආදර්ශයට ගන්නට එපා. මොකද සියල්ල අවුල් කරලා, අනික් අයගෙ ජීවිත විනාශ කරලා, මොන දේ සිද්ධ වුනත්, උන්දලාට නම් ගණිකා වෘත්තියෙ හරි යෙදිල සල්ලි හොයාගන්න පුළුවන්. මොකද උන්දලා කොහොමත් කතා හදාගෙන ඉවරයි දැන්. සාමාන්‍ය ගැහැණියකට මොකද වෙන්නෙ. අවුල් කරගන්න එක නෙමේ අවුල, ඒ අවුල ඇතුලෙ එතනින් එහාට ජීවත්වෙන්නෙ කොහොමද? එතෙන්ට වැටෙන්නට එපා, දේව මෑණියන්ගෙ නාමයෙන් කියන්නෙ, එතෙන්ටනම් වැටෙන්න එපා.’’

1985 දෙසැම්බර් 21 වෙනිදා නිර්මල කන්‍ය මරිය මාතාවෝ කටුනායක අප ස්වාමිදූගේ සිද්ධස්ථානයේ දර්ශණ දෙව්මැඳුර තුල දී 22 වන වරට දර්ශණය වූ අවස්ථාවේ දී එතුමිය ප්‍රකාශ කරනු ලැබූ වදන් ද සිහිපත් කර දෙමින් ශුද්ධෝත්තම රොහාන් ලලිත් අපොන්සු අපොස්තුළුතුමා මෙලෙසින් ද පවසනු ලැබුවා.

‛‛නිර්මල කන්‍ය මරිය මාතාවෝ 1985 දෙසැම්බර් 21 වෙනි දා, 22 වන වරට කටුනායක අප ස්වාමිදූගේ සිද්ධස්ථානයේ දී, ඒ කියන්නෙ මේ සිද්ධස්ථානයේ දී, මම දැන් ඔබට කතා කරන තැනම, මෙතැනම, විශාල ජන පිරිසක් මැද, ජීවමානවම පෙනී සිටිමින්, කිව්ව දේ මතකද? එතුමිය මෙහෙම කිව්වා, ‛‛නූතන ස්ත්‍රීන් අශෝභන ලෙස පළඳින ඇඳුම් ගැන ස්වාමින් වහන්සේ කම්පා වී සිටියි. පිරිසිදුකමද, ශීලාචාරකමද විනාශ කරවන අන්දමින් ඔවුන් දිනෙන් දිනම තම විලාසිතා නවීකරණය කර ගනියි. අශෝභන විලාසිතා තුලින් ඔවුන්ද සාතන්ට ලෝකය තුල ඉඩ සලසා දෙයි. නොහොබිනා ඇඳුම් මගින්, නොහොබිනා පිළිවෙලට තම ශරීර ප්‍රදර්ශණය කිරීමට ස්ත්‍රීන් දක්වන උනන්දුව අප්පිරියාවකි.’’ කොහොමද මරිය තුමියගෙ කතාව. ඉතින් දැන් ඔබට කාවද මතක් වෙන්නෙ? නෑ නෑ කාටවත් ඇඟිල්ල දික්කරන්නට එපා. අම්මලා දූලා හොඳට කල්පනා කරන්න, එක එක්කෙනා කල්පනා කරන්න. අම්මා කල්පනා කරන්න ‛මම එහෙමද, මගේ දුව එහෙමද’ කියලා. දුව කල්පනා කරන්න ‛මම එහෙමද, අපේ අම්මා එහෙමද’ කියලා. දෙගොල්ලොම කල්පනා කරල බලන්න, ‛ඇත්තටම සාතන්ට මේ ලෝකය තුල ඉඩ සලසලාද, දේව මෑණියන්ට අපිව අප්පිරියා වෙලාද’ කියල. ඉතින් දෙවියන්ටත් අප්පිරියා වෙච්ච අයගෙ කුහක කතා කියවලා, ඒ වගේම තවත් අය මහ ලොකුවට උඩ පැනලා වර්ණනා කරනවා දැක්කට මතක තියාගන්න ඔය ඔක්කොම මානසික රෝගීන්, ඔළුව රාගයෙන් පිස්සු වැටිලා. අම්මලා දූලා පරෙස්සම් වෙන්න. දේව මෑණියන්ව ජීවිතයෙන් නැතිකර ගන්නට එපා. දේව මෑණියන්වනම් ජීවිතයෙන් නැතිකර ගන්නට එපා.’’

ජේසුස් ක්‍රිස්තුස් වහන්සේ මෙලොව ගත කල ජීවිතයේ අවසාන කොටස පැය කීපයකට සීමා කරලා, පැය කීපයකට ලගු කරලා දුක් වීම ක්‍රිස්තියාණිකම නොවන බවත් පැවසූ ශුද්ධෝත්තම අපොස්තුළුතුමෝ ක්‍රිස්තියාණිකම යනු ඊට වඩා එහා ගිය දෙයක් බව ද, උන්වහන්සේගේ දුක්ප්‍රාප්තිය වසරේ දවස් තුන්සිය හැට පහේදී ම අප සිත් තුල රැදී පැවතිය යුතු බව ද පැවසූ සේක.

දිව්‍ය සත්ප්‍රසාදික ජේසු නැමැදීමේ සැදෑ මෙහෙය එදින ශුද්ධෝත්තම රොහාන් ලලිත් අපොන්සු අපොස්තුළුතුමාණන්ගේ ප්‍රධානත්වයෙන් පැවැත්වුන අතර, දිවයිනේ විවිධ ප්‍රදේශයන්ගෙන් පැමිණ සිටි සැදැහැවතුන් මේ සදහා ශුද්ධවූ පේදුරු සහ පාවුළු අපොස්තුළු උයන තුල රැස්වී සිටියහ.

තව දුරටත් රැස්ව සිටි සැදැවතුන් අමතමින් ශුද්ධෝත්තම අපොස්තුළුතුමාණන් වහන්සේ වදාලේ, අප ස්වාමීන් වන ජේසුස් ක්‍රිස්තුස් වහන්සේ මෙලොව ගත කල ජීවිතය පිළිබදව විශේෂයෙන් සලකා බලත් දී උන්වහන්සේගේ දුක් ප්‍රාප්තිය පිළිබදව අප බොහෝ දුක් වන බවත්, අවුරුදු දෙදහසකටත් වැඩි කාලයකට පෙර සිදු වූ එම දුක් ප්‍රාප්තිය අවුරුදු පතා සිහිපත් කරන බවත්, ක්‍රිස්තුස් වහන්සේ යම්කිසි එකම එක සභාවකට අයත් නොවන නිසා විවිධ සභාවන්ට අයත් ක්‍රිස්තියාණීන් කල්වාරිය පිහිටා ඇති ජෙරුසලමට යන බවත්, උන්වහන්සේ මුළු ලෝකයටම, මුළු මිනිස් වර්ගයාට ම අයිති බැවින්, ක්‍රිස්තුස් වහන්සේ අයිති මට විතරයි, නැත්නම් අපේ සභාවට විතරයි, අපේ කල්ලියට විතරයි, අපේ කණ්ඩායමට විතරයි යනුවෙන් කිසිවෙකුටවත් පවසා ක්‍රිස්තුස් වහන්සේව අයිති කර ගත නොහැකි බවත්, ක්‍රිස්තුස් වහන්සේව සියල්ලන්ට ම අයිති බවත් ය.

පැයකට ආසන්න කාලයක් තම දේශණය පැවැත් වූ ශුද්ධෝත්තම රොහාන් ලලිත් අපොන්සු අපොස්තුළුතුමාණෝ, යම් පිරිසකට ක්‍රිස්තුස් වහන්සේ වෙනුවෙන් යම් සංවිධානයක්, යම් සභාවක්, සමිතියක් පටන් ගත හැකි බවත් එය ගැටළුවක් නොවන නමුත් ක්‍රිස්තුස් වහන්සේව සියල්ලන්ට ම අයිති බව අමතක කල යුතු නැති අතර, ඒ බව අමතක කරනු ලැබුවහොත් එවැන්නෝ වැඩ වරද්දා ගන්නා අතර, ඇතැම් විට අමාරුවේ වැටෙන්නට ද ඉඩ ඇති බව පැවසූ සේක.

බෙත්ලෙහෙමේ දී ක්‍රිස්තුස් වහන්සේ උපත ලද ස්ථානය ලෙසින් සලකන ස්ථානයේ සවිකර ඇති ස්වර්ණමය තාරකාව අසල දී බොහෝ ක්‍රිස්තියාණින්ගේ මුහුණු නත්තල වගේම සතුටින් ආලෝකමත් වී ඇති බව ද, ඊට දින ගණනකට පසුව ජෙරුසලමට යන ඔවුන් ක්‍රිස්තුස් වහන්සේ කුරුසියේ දිවි පිදූ කල්වාරිය අසල දී දුක් බර මුහුණින් වැලපෙන අයුරු ද ශුද්ධෝත්තම අපොස්තුළුතුමා දුටු බවත්, බෙත්ලෙහෙම හෝ කල්වාරිය ශ්‍රී ලංකාවේ පිහිටා නැතත් ශ්‍රී ලංකාවේ ජීවත් වන ක්‍රිස්තියාණින් ද මෙලෙස ක්‍රියා කරන බවත්, නත්තල් දිනයේ අනුභව කරන මස්, මහ සිකුරාදාට අනුභව නොකරන අතර, මහ සිකුරාදාට අනුභව නොකරන මස් නත්තල් දිනයේ දී අනුභව කරන බවත්, එසේ කරනුයේ ඇයි ද කියා ප්‍රශ්ණ කල යුතු බවත් ශුද්ධෝත්තම රොහාන් ලලිත් අපොන්සු අපොස්තුළුතුමා වැඩි දුරටත් ප්‍රකාශ කල සේක.

දිව්‍ය සත්ප්‍රසාදික ජේසු නැමැදීමේ සැදෑ මෙහෙයේ දී, දිව්‍ය සත්ප්‍රසාද වහන්සේගෙන් ආශිර්වාදය දානය කිරීම ශුද්ධෝත්තම රොහාන් ලලිත් අපොන්සු අපොස්තුළුතුමාණන්ගේ දෝතින් සිදු වූ අතර, ඊට පෙර සැදැහැවතුන්, දිව්‍ය සත්ප්‍රසාද වහන්සේ ඉදිරිපිට රතු පැහැති ඉටිපහන් දල්වා තැන්පත් කර දිව්‍ය සත්ප්‍රසාද වහන්සේ වෙත සිය ගෞරවය පුදනු ලැබීය.

ක්‍රිස්තුස් වහන්සේ හෝ අපොස්තුළුතුමෙක් හෝ ඕනෑම අධ්‍යාත්මික ගුරුතුමෙක් ජනතාවට ධර්මයෙන් මග පෙන්වා දෙන විට එය ඔරොත්තු දෙනුයේ ඥාණවන්තයන්ට පමණක් බව උදාහණයන් සහිතව මෙහිදී විස්තර කරනු ලැබූ ශුද්ධෝත්තම අපොස්තුළුතුමා, අධ්‍යාත්මික ගුරුවරයෙක් තමා පැවසූ කිසිදු ප්‍රකාශයක් වැරදීමකින් පැවසූ දෙයක් ලෙසින් පවසා ඉවත් කර නොගන්නා අතර, ආධ්‍යාත්මික ගුරුවරයෙක් හොද සිහි කල්පනාවෙන්, බුද්ධිමත්ව කතා කරන බවත්, ඔවුන් කතා කරන්නේ ඥාණවන්තයන්ට බවත්, එවිට ඒ ඥාණවන්තයන් බුද්ධිමත්ව කල්පනා කර ගැටළු ඇත්නම් ඒ ගැන විමසන අතර, ලොවට පහළ වන කිසිදු අධ්‍යාත්මික ගුරුතුමෙක්, ‛ඒවා අභිරහස්’ නැතහොත් ‛ඒවා අපට තේරුම් ගන්නට බැහැ’ වැනි පිළිතුරු දිය නොහැකි ලිස්සා යන ප්‍රකාශයන් නොකරන බවත් පැවසූ සේක.

2020 අගෝස්තු 15 වෙනි සෙනසුරාදා සවස කටුනායක අප ස්වාමිදූගේ සිද්ධස්ථානයේ, ශුද්ධවූ පේදුරු සහ පාවුළු අපොස්තුළු උයනේ දී ශුද්ධෝත්තම රොහාන් ලලිත් අපොන්සු අපොස්තුළුතුමාණන්ගේ ප්‍රධානත්වයෙන් පවත්වනු ලැබූ දිව්‍ය සත්ප්‍රසාදික ජේසු නැමැදීමේ සැදෑ මෙහෙයේ අවස්ථාවන් කීපයක් මෙහි ඡායාරූප මගින් ඔබට දැක ගත හැකියි

‛‛දැනට අවුරුදු 45 කට පෙර, අද වැනි දිනයක එනම්, 1975 පෙබ්‍රවාරි මාසයේ 7 වෙනිදා සවස 6.30 ට පමණ මේ ස්ථානයෙහි (කටුනායක අප ස්වාමිදූගේ සිද්ධස්ථානයෙහි) ජේසුස් ක්‍රිස්තුස් වහන්සේ ලොව දෙවන වරට අපොස්තුළු තුමෙක් තෝරා ගැනීම පිණිස දර්ශණය වෙලා, අපොස්තුළුතුමෙක් තෝරලා, උන්වහන්සේගේ ශ්‍රී පාද පද්මයන් හි සටහන් තබා, අප වෙතින් නික්ම ගිහිල්ලා, එම සිද්ධිය අද අපි මේ මොහොතේ සමරනවා. ක්‍රිස්තුස් වහන්සේ මේ ලෝකයට දර්ශණය වී අපොස්තුළුතුමෙක් පත් කිරීම සදහා, දෙවන වරට ලොව පැමිණීම ගැන කියද්දී, පළමු වරට එවැනි සිද්ධියක් සිදු වී තිබීම, අපට එක් අතකින් යම්කිසි ආලෝකයක් සපයනවා, මේ දෙවන වර සිද්ධිය සදහා. යම් ලෙසකින් මෙම සිදුවීම, එනම්, අවුරුදු 45 කට පෙර සිදු වූ මේ සිදුවීම, දෙවන සිද්ධිය නොවී, පළමු සිද්ධිය වූවානම් අපට කරුණු කාරණා උකහා දෙන්නට තරමක් දුෂ්කර වෙනවා. අද දෙවෙනි අවස්ථාවේ දී තත්වය මෙසේනම්, පළමු තත්වයක්ද නොතිබුනා නම්, අද සිටින ක්‍රිස්තියාණීන්ට තේරුම් ගැනීම කොයි තරම් දුරට දුෂ්කර වෙයිද?’’

අති උත්තම රොහාන් ලලිත් අපොන්සු ශුද්ධෝත්තම අපොස්තුළුතුමා 2020 පෙබ්‍රවාරි 7 වෙනි දින මෙම වදන් ප්‍රකාශ කරනු ලැබුවේ, කටුනායක අප ස්වාමිදූගේ සිද්ධස්ථානයේ දර්ශණ දෙව්මැදුරේදී පවත්වනු ලැබූ මංගල මහා දිව්‍ය පූජාවේ සිය දේශණය ආරම්භ කරමිනුයි.

ශුද්ධෝත්තම රොහාන් ලලිත් අපොන්සු අපොස්තුළුතුමා ජේසුස් ක්‍රිස්තුස් වහන්සේගේ ශ්‍රී හස්තයෙන් අපොස්තුළුවර තත්වය ලබාගෙන වසර 45 ක් සම්පූර්ණ වීමේ සංවත්සරය අළලා මෙම මංගල මහා දිව්‍ය පූජාව එදින පැවැත්වූයේ ශුද්ධෝත්තම අපොස්තුළුතුමන් පෙන්වා දෙන දහම් හඩ ඔස්සේ තම ජීවිතය ඔපවත් කරගන්නා සැදැහැවත් බැතිමතුන් රාශියක් මධ්‍යයේයි.

තව දුරටත් රැස්ව සිටි සැදැහැවතුන් අමතනු ලැබූ ශුද්ධෝත්තම රොහාන් ලලිත් අපොන්සු අපොස්තුළුතුමා, ජේසුස් ක්‍රිස්තුස් වහන්සේ මෙලොවට දර්ශණය වී පත්කරනු ලැබූ පළමුවන අපොස්තුළුතුමා වන ශුද්ධෝත්තම පාවුළු අපොස්තුළුතුමා කොරින්ති වරුන් වෙත ලියනු ලැබූ පළමු වන ලිපියෙන් කොටසක් මෙලෙස උපුටා දක්වනු ලැබුවා.

‛‛මම නිදහස් කෙනෙක් නොවෙම් ද? මම අපොස්තුළුවරයෙක් නොවෙම්ද? අපගේ ස්වාමීන් වන ජේසුස් වහන්සේ මම නුදුටිම්ද? ඔබ හැම ස්වාමින් වහන්සේ උදෙසා මා කළ සේවයේ ප්‍රතිඵල නොවන්නහුද? අන්‍යයන්ට මා අපොස්තුළුවරයෙකු නොවෙතත්, යටත් පිරිසෙයින් ඔබට මම අපොස්තුළුවරයෙක් වෙමි’’ (1 කොරින්ති 9/ 1 සහ 2) ශුද්ධෝත්තම පාවුළු අපොස්තුළුතුමාගේ ලිපියේ සදහන් මෙම වගන්ති කීපයෙන් දෙන අර්ථය තුලින් විශාල පණිවිඩයක් සියල්ලන්ටම ලැබෙන අතර බුද්ධියක් ඇත්නම් එම පණිවිඩය තේරුම් ගත හැකි බවත්, මේ වගන්ති කීපය පිළිබදව විග්‍රහයක් කරන්නට බලාපොරොත්තු වන බවත් පැවසූ ශුද්ධෝත්තම රොහාන් ලලිත් අපොන්සු අපොස්තුළුතුමා, විචාර බුද්ධියෙන් යුතුව මේ ගැන විමසා බලන ලෙස ආරාධනය කරන බවත් ප්‍රකාශ කරනු ලැබුවා.

ශ්‍රී ලංකාවේ කටුනායක අප ස්වාමිදූගේ සිද්ධස්ථානයේ දර්ශණ දෙව්මැදුර තුල දී වසර 45 කට ප්‍රථම ජේසුස් ක්‍රිස්තුස් වහන්සේ දර්ශණය වූ නියමිත ස්ථානය අසල සිට ශුද්ධෝත්තම අපොස්තුළුතුමා මේ දේශණය පවත්වනු ලැබූ අතර, තව දුරටත් උන්වහන්සේ මෙලෙසින් ද ප්‍රකාශ කරනු ලැබුවා.

‛‛ශුද්ධෝත්තම පාවුළු අපොස්තුළු තුමා මුලින්ම කියනවා, ‛‛මම නිදහස් කෙනෙක් නොවෙම්ද?’’ කියලා. අපොස්තුළු තුමෙක් කියන්නේ නිදහස් කෙනෙක්. ඔයගොල්ලෝ ශුද්ධවු සුවිශේෂයෙන් අද ජේසුස් ස්වාමින් වහන්සේගේ වදන් වලට සවන් දුන්නා. අපොස්තුළුවරයෙක් යනු, ලෝකයා කෙරෙන් පවා වෙන්කර ගත්තු පුද්ගලයෙක්. ඒ කියන්නේ අපොස්තුළු තුමෙක් කිසිම කෙනෙකුට, කිසිම දෙයකට, කිසිම කල්ලියකට, කිසිම කණ්ඩායමකට අයිති වෙච්ච, වහල් වෙච්ච පුද්ගලයෙක් නොවේ. ඒ නිසා අපොස්තුළු තුමෙක් කිසිදු කිතුණු සභාවකට අයිති පුද්ගලයෙක් නොවේ. අද ලෝකයේ ජීවත් වන ක්‍රිස්තියාණීන් විවිධ සභාවන්ට අයිති වෙලා ඉන්නවා. ඔවුන් විවිධ සභාවන්හි අනුගාමිකයෝ. ඒ විවිධ සභාවන්වල විවිධ විශ්වාසයන් තිබෙනවා. දිව්‍ය සත්ප්‍රසාදය පිළිබඳව විවිධ විශ්වාසයන් තියෙනවා. මරියතුමී පිළිබඳව විවිධ විශ්වාසයන් තියෙනවා. මරණින් පසු ජීවිතය පිළිබඳව විවිධ විශ්වාසයන් තියෙනවා. ලෝකයට ඉපදීම පිළිබඳව විවිධ විශ්වාසයන් තියෙනවා. ඒ ඒ සභාවල පූජකවරු ඒ ඒ සභාවල අනුගාමිකයන්ට උගන්වන්නේ ඒ ඒ සභාවේ නායකයා අනුමත කළ විශ්වාසයයි.’’

ස්වර්ගාරෝහණයෙන් පසුව ජේසුස් ක්‍රිස්තුස් වහන්සේ මෙලොවට දර්ශණය වී පත්කරනු ලැබූ පළමු වන අපොස්තුළුතුමා වූ, ශුද්ධෝත්තම පාවුළු අපොස්තුළුතුමා ක්‍රිස්තු වර්ෂ 65 දී පමණ මරා දමනු ලැබුවේ ද මෙම සිද්ධියම මුල් කර ගෙනයි. එනම් ශුද්ධෝත්තම පාවුළු අපොස්තුළුතුමා, ජුදා ජාතික පුද්ගලයෙක් ලෙස ‛සාවුල්’ නමින් ජීවත්ව සිටිය දී සිරියාවේ, දමස්කස් නගරයේ දී ජේසුස් ස්වාමින් වහන්සේ දර්ශණය වී අපොස්තුළුවරයට තෝරා ගැනීම හේතුවෙන්, ඒ පිළිබදව ප්‍රසිද්ධියේ සාක්ෂි දරමින්, දේශණා කිරීම නිසා, හිස කදින් වෙන්කර මරා දමනු ලැබුවා. එම සිදුවීමෙන් වසර 1910 කට පසුව 1975 පෙබ්‍රවාරි 7 වෙනි දින, ජේසුස් ක්‍රිස්තුස් වහන්සේ ශ්‍රී ලංකාවේ, කටුනායක නගරයේ දී දර්ශණය වී තෝරාගනු ලැබූ ශුද්ධෝත්තම රොහාන් ලලිත් අපොන්සු අපොස්තුළුතුමා තවමත් අප අතර ජීවත්ව සිටින නිසා, උන්වහන්සේගේ දහම් හඩ ඇසීමට පිනක් ඇති ජනතාවට ලැබී ඇති තවත් පින්බර අවස්ථාක් වූ, මෙම මහා පූජනීය සිදුවීමට වසර 45 ක් සපිරුණ 2020 පෙබ්‍රවාරි 7 වෙනි දින සවස, 45 වන සංවත්සර දිව්‍ය පූජාව අවස්ථාවේ දේශණය පවත්වමින්, අද අප අතර ජීවත්වන අපේම අපොස්තුළුතුමා මෙලෙසින් ද ප්‍රකාශ කරනු ලැබුවා.

‛‛ශ්‍රී ලංකාවේ විභාගයන් වල දී ක්‍රිස්තු ධර්මය ප්‍රශ්න පත්තර දෙකක් තියෙනවා. එකක් කතෝලික ධර්මය, අනිත් එක ක්‍රිස්තු ධර්මය. දැන් කොයි එකේද ක්‍රිස්තු ධර්මය හෙවත් ක්‍රිස්තුස් වහන්සේ වදාළ ධර්මය පිළිබද ප්‍රශ්ණ තිබෙන්නේ? ගිය අවුරුද්දේ අ.පො.ස. සාමාන්‍ය පෙළ විභාගයේ දී ආගම විෂයට, සියලුම ආගමිකයන් උත්තර ලිව්වේ එකම දවසේ, එකම වෙලාවෙ. බුද්ධ ධර්මය එක ප්‍රශ්න පත්තරයයි. හින්දු ධර්මය එක ප්‍රශ්න පත්තරයයි. ඉස්ලාම් ධර්මය එක ප්‍රශ්න පත්තරයයි. ක්‍රිස්තු ධර්මය ප්‍රශ්න පත්තර දෙකයි. කතෝලික ධර්මය සහ ක්‍රිස්තු ධර්මය. එක්කෝ මේ දෙකෙන් එකක් ඇත්ත, නැත්තම් මේ දෙකම බොරු. මගෙ තර්කය හරිද? මේ එකක් ඇත්ත. දෙකම ඇත්ත වෙන්ඩ බෑ. එහෙමනම් එක ප්‍රශ්න පත්තරයක් ඇති. එක්කෝ මේ ප්‍රශ්න පත්තර දෙකේ ම ක්‍රිස්තු ධර්මය නෑ, නැත්තම් එකක ක්‍රිස්තු ධර්මය තියෙනවා, අනික් ප්‍රශ්ණ පත්‍රයේ ක්‍රිස්තු ධර්මය නැහැ. ගැටළුවක්. අපොස්තුළුතුමෙක්ට පුළුවන් මේ දෙකේම බොරු හෝ ඇත්ත හෙළි කරන්න සහ පැහැදිලි කරන්න. මොකද අපොස්තුළු තුමා නිදහස් කෙනෙක්. අපොස්තුළුතුමා කිසියම් සභාවකට අයිති නම් ඒ සභාවේ නායකයා උගන්වන දේ තමයි එයාටත් කියන්න වෙන්නේ. ඇත්ත හෝ බොරු හෝ ඒ දෙකෙන් එකක් කියන්ඩ වෙන්නේ.’’

විනාඩි 58 ක් පුරා සිය දේශණය පැවැත් වූ ශුද්ධෝත්තම රොහාන් ලලිත් අපොන්සු අපොස්තුළුතුමා ‛‛ක්‍රිස්තුස් වහන්සේ අයිති කුමන සභාවට දැ’’ යි ප්‍රශ්ණයක් ද නගනු ලැබූ අතර, ‛‛ක්‍රිස්තුස් වහන්සේගේ ආගම කුමක් දැ’’ යි ඒ සමගින්ම නගනු ලැබූ පැනයෙන් සියළු සැදැහැවතුන්ට අමුතුවෙන් කල්පනා කරන්නට ආරම්භක් ද ලබා දුන්නේ, ඔවුන් සියල්ලන්වම අන්ද මන්ද කරවමිනුයි.

මෙලොව ජීවත්වන අයෙකුට මිනිස් අත්වලින් ලැබිය හැකි විවිධ තනතුරු ඇතත්, මෙලොව ජීවත් වන්නා වූ අයෙකුට තම මරණයට පෙර ජේසුස් ක්‍රිස්තුස් වහන්සේ වෙතින් ලද හැකි අති පූජනීය තත්වය වන්නේ ‛‛අපොස්තුළුවරය’’යි. එම පූජනීය තත්වයෙන් පිදුම් ලැබූ ලොව දස සතර වැන්නා වූ ශුද්ධෝත්තම රොහාන් ලලිත් අපොන්සු අපොස්තුළුතුමා, අපොස්තුළු තත්වය ලබා වසර 45 ක් සම්පූර්ණ වීමේ සංවත්සරය සමරමින් 2020 පෙබ්‍රවාරි 7 වෙනි දින, කටුනායක අප ස්වාමිදූගේ සිද්ධස්ථානයේ දර්ශණ දෙව්මැදුර තුල පවත්වනු ලැබූ මංගල මහා දිව්‍ය පූජාවේ අවස්ථාවන් කීපයක් මෙම ඡායාරූප ඔස්සේ ඔබට දැකගත හැකිවනු ඇත

මහනුවර, මහයියාවේ, නිමල්කා දේවින්දි ආරියසිංහ මහත්මියගේ ඒ පුදුම කතාවට ඔබගේ දෑසට කදුළු උනනවා, සහතිකයි. සම්පූර්ණ කතාව පහතින් කියවන්න.

මගේ එකම පුංචි දරු පැටියට වයස මාස 5 යි. ඉපදිලා සතියක් යන තුරු මගෙන් හොදට කිරි බිව්වා. ඊට පස්සේ කොහොමටවත් මගෙන් කිරි බිව්වේ නැහැ. වෛද්‍යවරු කිව්වෙ දරුවට කොහොම හරි මව් කිරි දීම අනිවාර්ය බවයි. නැත්නම් දරුවාගේ වර්ධනයට එය සම්පූර්ණයෙන්ම බලපාන බවයි. කොහොමහරි දරුවව මව් කිරි වලට හුරු කරගන්න තුරු දෙන්න පිටි කිරි වර්ගයක් නියම කලා. නමුත් එය නිවැරදි සාර්ථක විසදුම නොවන බව ද වෛද්‍යවරයා කිව්වා. විශ්ෂඥ වෛද්‍ය වරයෙකු ලගටත් ගිහිල්ලා මේ බව කිව්වා. ඔහු කිව්වේ මවු කිරි නොබීමෙන් දරුවාගේ මොලයේ වර්ධනයට දැඩි ලෙස බලපෑම් එල්ල විය හැකි නිසා අනිවාර්යයෙන්ම මව් කිරි දීම සිදුකල යුතු බවයි. එම විශේෂඥ වෛද්‍යවරයා මේ සදහා මට පුංචි උපායක් කිව්වා. පුංචි පුතාට හොදටම බඩගිනි උනාම, සීනි ටිකක් දිය කල වතුර ටිකක් තන පුඩුවල ගාලා දරුවට මවු කිරි පුරුදු කරන්න කිව්වා. නමුත් ඒ ක්‍රමය හරි ගියේත් නැහැ. මේ අතර දරුවට නිතරම හෙම්බිරිස්සාව හැදෙන්නත් පටන් ගත්තා. ඔක්කොමල්ලම කිව්වේ මේ කාලයට මව් කිරි වලින් ලැබිය යුතු පෝෂණය නොලැබෙන නිසා කියලා. එක එක පල්ලි ගානෙ සුව මෙහෙයන් වලටත් දරුවව අරගෙන ගියා. නමුත් මගේ දරු පැටියා මවු කිරි බිව්වේ නැහැ. හැමදාම මොකක් හරි අසනීපයක්. දවසක් අපේ අල්ලපු ගෙදර ඉන්න, මට ගොඩක් හිතවත් මිතුරියක් අප්‍රියල් 29 වෙනිදා තිබුණු කටුනායක අප ස්වාමිදූගේ සිද්ධස්ථානයේ පැවැත්වුන දේව අම්මාට ඔටුණු පැළඳවීමේ මංගල්ලය ගැන කිව්වා. මමත් අන්තර් ජාලයෙන් බැලුවා. ඒ තිබුන විස්තර අනුව මම අප්‍රියල් 29 සෙනසුරාදා උදේ මගේ එකම ඉල්ලීම ලෙස කොලයක මගේ ඉල්ලීම ලිව්වා. ‛‛ජේසු අම්මේ ඔබ තුමියත් අම්මා කෙනෙක්. මගේ එකම දරු පැටියා මගෙන් කිරි බොන්නේ නැහැ. ඔබ තුමිය මගේ දරුවට කියන්න මගෙන් කිරි බොන්න කියලා.’’ මෙන්න මේ ටික ලියාගෙන අප්‍රියල් 29 වෙනිදා මම කටුනායක අප ස්වාමිදූගේ සිද්ධස්ථානයට යනකොට සවස 5.30 ට විතර ඇති. අනේ ලොකු සෙනගක්. මගේ දරුවවත් තුරුල් කරගෙන කොහොමහරි හරිම අමාරුවෙන් සිද්ධස්ථාන භූමියට ඇතුළු උනා. මිනිස්සු තෙරපෙනවා. මම කොහොමහරි දරුවව හොදට තුරුළු කරගෙන ඒ සෙනග අතරෙ හිරවෙලා හිටියා. දේව මෑණියන්ට ඔටුණු පැළදවීමේ අවස්ථාවට පස්සේ ශුද්ධෝත්තම අපොස්තුළුතුමා දේව මෑණියන්ට කියන විශේෂ යාච්ඤාව ආරම්භ කිරීමට පෙර අපගේ එකම ඉල්ලීම ලියපු පත්‍රිකා දකුණු අතට ගන්ඩ කිව්වා. මම වම් අතින් දරුවව පපුවට තුරුළු කරගෙන, මම ගෙදරින් ලියාගෙන ආපු පත්‍රිකාව දකුණු අතට ගත්තා. ශුද්ධෝත්තම අපොස්තුළුතුමා යාච්ඤාව ආරම්භ කෙරුවා. ඒ අතර නිහඩව අපගේ ඉල්ලීම් ඉල්ලන්නත් උන්වහන්සේ අපට කෙටි වෙලාවක් ලබා දුන්නා. අපගේ ඉල්ලීම් වෙනුවෙන් ශුද්ධෝත්තම අපොස්තුළුතුමා අපට ආශිර්වාද කලා. උන්වහන්සේව දකිත්දී මට හිතුනා, ජේසුවත්, දේව මෑණියන්වත් ඇස් දෙකෙන් දැක්ක කෙනෙක් නේද මේ කියලා. යාච්ඤාව අවසානයේ ශුද්ධෝත්තම අපොස්තුළුතුමා කිව්ව විදිහට බොහොම අමාරුවෙන් තෙරපි තෙරපී ඉදිරියට ගිහිල්ලා, නිල් මැණික් රත්තරන් ඔටුන්න පළදවපු දේව මෑණියන්ගේ ප්‍රතිමාව ඉදිරියේ පෙට්ටියට මගේ ඉල්ලීම දැම්මා. මගේ ඉල්ලීම දාලා අත ගන්නවාත් එක්කම චූටි පුතා අඩන්න පටන් ගත්තා. එච්චර වෙලා, සෙනග තෙරපෙද්දීත්, කිසිම කරදරයක් නොකර හිටපු මගේ දරු පැටියට හොදටම බඩගිනි වෙලා කියලා මට තේරුනා. සියළු කටයුතු අවසාන නිසා මම දරුවවත් අරගෙන සිද්ධස්ථාන භූමියෙන් පිටත තරමක් දුරින් නවත්වලා තිබුණ අපේ වාහනයට ඉක්මනින් ගිහිල්ලා කිරි දෙන්න පටන් ගත්තා. මම ආරක්ෂිතව බෝතලයට පිටි කිරි සාදාගෙන ගිහිල්ලා තිබුණත්, මගේ හිතේ විශ්වාසය නිසා මගේම කිරි දෙන්න බැලුවා. පුදුමයි ඉපදිලා සතියක් පමණක් මගෙන් කිරි බීලා මාස හයක් මවු කිරි බිව්ව නැති මගේ චූටි පුතා හොදට බඩ පිරෙන්න මගෙන් කිරි බිව්වා. මගේ ඇස් වලින් කදුළු ගැලුවා. දරුවා කිරි බිව්වට පස්සේ මම ආයෙත් සිද්ධස්ථානයට ගිහිල්ලා දේව මෑණියන්ට ස්තූති කරලා ආපසු නුවර එන්න පිටත් වුනා. මාස හයකට පස්සේ හොදට බඩ පිරෙන්න මවු කිරි බීලා අපි නුවර එනකල්ම පුතා හොදට නිදා ගත්තා. පසුවදා (අප්‍රියල් 30 වෙනිදා) උදේ පුංචි පුතාට මවු කිරි දෙන්න උත්සහ කෙරුවත් පුතා බිව්වෙම නැහැ. එදා දවසෙම මවු කිරි බිව්වෙ නැහැ. ආයෙත් පිටි කිරි තමයි දුන්නේ. ඊට පසුවදා (මැයි 1 වෙනිදා) ත්, පුතා මවු කිරි බිව්වෙ නැහැ. එදාත් පිටි කිරි දුන්නා. මට ලොකු දුකක් ඇති උනා. නමුත් මම හිතුවා මට දේව මෑණියෝ පිහිට වෙනවාමයි කියලා. එතුමිය මට පිහිට වෙන්න කටුනායක අප ස්වාමිදූගේ සිද්ධස්ථානයේ බලාගෙන ඉන්නවා කියලා මගේ හිත මට කියන්න පටන් ගත්තා. ඒ නිසා මම මැයි 2 වෙනිදා ආයෙත් මගේ චූටි පුතාවත් තුරුළු කරගෙන කටුනායක අප ස්වාමිදූගේ සිද්ධස්ථානයට ගියා. සිද්ධස්ථාන භූමියේ තැන්පත් කර තියන, ජේසු බිළිදු වඩවාගෙන සිටින දේව මෑණියන්ගේ ප්‍රතිමාව පාමුල වාඩිවෙලා, අප්‍රියල් 29 වෙනිදා මම ලියාගෙන ගිය වැකිය කියවමින් යාච්ඤා කරලා, ජපමාලයත් කියලා සිද්ධස්ථාන භූමියෙන් එලියට ආවා. එලියට ආපු ගමන්ම එදා අප්‍රියල් 29 වෙනිදා වගේම චූටි පුතා අඩන්න පටන් ගත්තා. මමත් එදා වගේම ඉක්මනින්ම වාහනයට නැගලා, මම ගෙදරින් හදාගෙන ගිය කිරි දෙන්නේ නැතුව, මම ම කිරි දෙන්න පටන් ගත්තා. හොඳට බඩ පිරෙනකම් උර උරා කිරි බිව්වා. අනේ මට හරි දුකක් ඇති උනා. මම ආයෙත් සිද්ධස්ථාන භූමියට ගිහිල්ලා දේව මෑණියන්ට පුතාව පෙන්නලා ස්තූති කරලා නුවර ආවා. ඒ උනත් ගෙදර ආවට පස්සේ චූටි පුතා මගෙන් මවු කිරි බිව්වේ නැහැ. මේක මට තේරුම් ගන්න බැරි ගැටළුවක් උනා. අපේ ගෙදර මොකක් හරි දෝෂයක් ද කියලත් මට හිතුනා. ඊට පස්සේ දිගටම කොච්චර උත්සහ කෙරුවත් පුතා මවු කිරි බිව්වේ නැහැ. නැවතත් මැයි 4 වෙනිදා මම නුවර ඉදන් කටුනායක අප ස්වාමිදූගේ සිද්ධස්ථානයට ගියා. පුරුදු විදහට සිද්ධස්ථාන භූමියේ ස්ථාපිත කර තියන, මරිය තුමී ජේසු බිළිදු වඩවාගෙන ඉන්න ප්‍රතිමාව පාමුල, අඹ ගහ අයිනේ වාඩිවෙලා දේව මෑණියන්ගේ ප්‍රතිමාව දිහා බලාගෙන මගේ දුක කිව්වා. අප්‍රියල් 29 වෙනිදා ශුද්ධෝත්තම අපොස්තුළුතුමන් ආශිර්වාද කරත් දී උඩට ඔසවපු කොල කැබැල්ලේ මම ලියපු වැකියම මම දේව මෑණියන්ගේ ප්‍රතිමාව දිහා බලාගෙන කිව්වා. ඒ වැකිය ටික වේලාවක් කියවත් දී මම දැක්කා දේව මෑණියන්ගේ ප්‍රතිමාව ක්‍රමයෙන් වෙනස් වෙනවා කියලා. මම හොදට බලාගෙන හිටියා. මම කියන ඉල්ලීම් වැකියට එතුමිය ‛හා හා’ කියන්නාක් වගේ යාන්තමට හිස වනනවා මම දැක්කා. මම ඇස් දෙක පිසදාගෙන ආයෙත් බැලුවා. ඒ විදිහටම දේව මෑණියන්ගේ ප්‍රතිමාව හිස සලනවා මම හොදටම දැක්කා. තත්පර ගනනයි එහෙම උනේ. නැවත දේව මෑණියන්ගේ ප්‍රතිමාව සාමාන්‍ය තත්වයට පත් උනා. මට ලොකු සතුටක් දැනුනා. මම හිතුවා මගේ ඉල්ලීම දේව මෑණියෝ මට දුන්නාම තමයි කියලා. ඒ එක්කම පුතා දගලන්න පටන් ගත්තා. දේව මෑණියන්ගේ ප්‍රතිමාව දිහා බලාගෙන ‛මම ඉක්මනට එන්නම් මෑණියනි’ කියලා පුතාවත් අරගෙන සිද්ධස්ථාන භූමියෙන් පිටවෙලා වාහනයට ගිහින් පුතාට මම ම මවු කිරි දුන්නා. හොදට බඩ පිරෙන්න පුතා මගෙන් කිරි බිව්වා. ඊට පස්සෙ මම ආයෙත් සිද්ධස්ථාන භූමියට ගිහිල්ලා දේව මෑණියන්ගේ ප්‍රතිමාව පාමුල වාඩිවෙලා මෑණියන්ට ස්තූති කෙරුවා. මගේ හිත කිව්වා මගේ ඉල්ලීම කටුනායක හාස්කම් සිද්ධස්ථානයේ වැඩ සිටින දේව මෑණියෝ ඉෂ්ඨ කෙරුවාමයි කියලා. ඊට පස්සෙ මම කටුනායක අප ස්වාමිදූගේ සිද්ධස්ථානයෙන් පිටත් වෙලා නුවර එන්න ආවා. කඩුගන්නාව හරියේ දී චූටි පුතා නැවතත් මගෙන් කිරි බිව්වා. එයින් පස්සේ චූටි පුතාට පිටි කිරි දෙන්න සිද්ධ උනේම නැහැ. දැන් හොදට මගෙන් කිරි බොනවා. ඒ වගේම පුතාට උවමනා තරම් දෙන්න මට කිරිත් තිබෙනවා. කටුනායක අප ස්වාමිදූගේ සිද්ධස්ථානයේ නිර්මල මරිය තුමී ජීවමානවම වැඩ සිටිනවා. ඒක මට ස්ථීරයි. එතුමිය පවුකාර අපට පිහිට වෙන්නේ හරිම පුදුම විදිහට. මට පිහිට වූ ආකාරය මට ම පුදුමයි. අද මම මේ ලිපිය ලියන්නේ, මැයි 20 වෙනි දා. මරිය තුමී කටුනායක අප ස්වාමිදූගේ සිද්ධස්ථානයේ දී හිස සලා මට සංඥා කලාට පස්සේ, එදා ඉදන් මගේ චූටි පුතා ඉපදිලා මාස හයකට පස්සේ දැන් හොදට මවු කිරි බොනවා. ඇත්තටම මරිය තුමී විසිතුන් වාරයක් දර්ශණය වී ඇති කටුනායක අප ස්වාමිදූගේ සිද්ධස්ථානයේ දී මම දේව මෑණියන්ව අත්දැක්කා.

නිමල්කා දේවින්දි ආරියසිංහ

මහයියාව – මහනුවර